बुटवल :- सहकारी ठगी प्रकरणमा कारागारमा रहेका तत्कालीन गोर्खा मिडियाका सञ्चालक छविलाल जोशी धरौटीमा रिहा भएका छन्। थुनामुक्त हुन पाउनुपर्ने मागसहित जोशीले दिएको निवेदनमाथि सुनुवाइ गर्दै उच्च अदालत तुलसीपुरको बुटवल इजलासले मिसिल पुनः जिल्ला अदालतमा पठाउने आदेश दिएको थियो।
उक्त आदेशपछि आइतबार रुपन्देही जिल्ला अदालतका न्यायाधीश डिल्लिराम शर्मा अर्यालको एकल इजलासले जोशीसँग धरौटी माग गर्दै थुनामुक्त गर्ने आदेश दिएको हो। अदालतले तोकेको धरौटी रकम बुझाएपछि जोशी कारागारबाट रिहा भएका हुन्।
जोशी बुटवलस्थित सुप्रिम सहकारी संस्थाको रकम ठगी तथा संगठित अपराध अभियोगमा थुनामा थिए। सोही प्रकरणमा उनीसहित विभिन्न व्यक्तिविरुद्ध अनुसन्धान र मुद्दा दायर गरिएको छ।
यसअघि यही प्रकरणमा राष्ट्रिय स्वतन्त्र पार्टी (रास्वपा)का सभापति रवि लामिछाने पनि थुनामा परेका थिए। तर उच्च अदालत बुटवलले यही पुस ३ गते लामिछानेलाई धरौटीमा थुनामुक्त गर्ने आदेश दिएको थियो।
अदालतका पछिल्ला आदेशसँगै सहकारी ठगी प्रकरणले नयाँ मोड लिएको छ। अब छविलाल जोशीमाथि लगाइएका आरोपको अन्तिम टुंगो आगामी अदालती कारबाही र अन्तिम फैसलाबाट तय हुने देखिएको छ।
