बुटवल:- विश्व स्वास्थ्य दिवसको अवसर पारेर सिद्धार्थ कटेजले उदाहरणीय सामाजिक कार्यका रूपमा रक्तदान कार्यक्रम आयोजना गरी सम्पन्न गरेको छ। “रक्तदान जीवनदान” भन्ने सन्देशलाई व्यवहारमा उतार्दै गरिएको यस कार्यक्रमले समाजमा मानवीय सेवाको भावना अझ सुदृढ बनाएको देखिएको छ।
कटेज परिसरमा सम्पन्न उक्त कार्यक्रममा सबै कर्मचारीहरूको उत्साहजनक सहभागिता रहेको थियो। पछिल्लो समय विभिन्न अस्पतालहरूमा रगतको अभाव भइरहने अवस्थालाई मध्यनजर गर्दै आयोजना गरिएको यस कार्यक्रमले धेरै बिरामीलाई जीवनदान पुग्ने विश्वास गरिएको छ।
कार्यक्रमका अध्यक्ष पदम न्यौपानेले रक्तदान जस्तो पुण्य कार्यले मानवीय संवेदनालाई जागृत गराउने उल्लेख गर्दै यस्ता कार्यक्रम निरन्तर सञ्चालन गर्नुपर्नेमा जोड दिनुभयो। उहाँले युवापुस्तालाई सामाजिक जिम्मेवारीप्रति सचेत भई यस्ता कार्यमा अग्रसर बन्न आग्रह गर्नुभयो।
कार्यक्रमको संयोजन सिद्धार्थ कटेजका मानव संसाधन प्रमुख जस्मिन टण्डनले गर्नुभएको थियो। उहाँले संस्थाले सामाजिक उत्तरदायित्वलाई प्राथमिकतामा राख्दै यस्ता कार्यक्रमहरू निरन्तर सञ्चालन गर्दै आएको जानकारी दिनुभयो।
आयोजकका अनुसार सामाजिक सेवामा योगदान पुर्याउने उद्देश्यले कार्यक्रम आयोजना गरिएको हो। रक्तदान कार्यक्रममार्फत समाजमा सकारात्मक सन्देश प्रवाह हुनुका साथै आवश्यक परेका बिरामीहरूलाई सहयोग पुग्ने अपेक्षा गरिएको छ।
यस किसिमका कार्यक्रमहरूले संस्था केवल व्यवसायमा मात्र सीमित नभई समाजप्रति उत्तरदायी बन्नुपर्ने सन्देश स्पष्ट रूपमा दिएका छन्।
