काठमाडौं :- सुधन गुरुङ ले गृहमन्त्रीको पदभार ग्रहण गरेका छन्। राष्ट्रपति कार्यालयमा सम्पन्न शपथ ग्रहणपछि उनी सिंहदरबार पुगेर औपचारिक रूपमा जिम्मेवारी सम्हालेका हुन्।
पदभार ग्रहणसँगै गृहमन्त्री गुरुङले आफ्नो पहिलो निर्णयस्वरूप गृह मन्त्रालयअन्तर्गतका सबै सेवा तथा कामहरू ‘एकद्वार प्रणाली’ मार्फत सञ्चालन गर्ने घोषणा गरेका छन्। सेवा प्रवाहलाई सरल, छिटो र प्रभावकारी बनाउने उद्देश्यले यस्तो निर्णय लिइएको उनले बताएका छन्।
पदभार ग्रहण कार्यक्रममा बोल्दै उनले भीआईपी लावालस्करका कारण सर्वसाधारणलाई दुःख दिने प्रवृत्ति अन्त्य गरिने स्पष्ट पारे। “कम बोल्ने मान्छे हुँ, अब काममा देखिन्छु। जेनजीको माग अनुसार हामी आएका हौं, सुशासनविरुद्धका कुनै काम हुन दिइने छैन,” उनले भने।
उनले सेवा प्रवाह (Service Delivery) मा गुनासा आउन नदिन कर्मचारीहरूलाई विशेष ध्यान दिन निर्देशन दिएका छन्। नयाँ सरकारको प्राथमिकता अनुसार गृह प्रशासनलाई जनमुखी र पारदर्शी बनाउनेतर्फ आफू केन्द्रित रहने उनले संकेत दिएका छन्।
