काठमाडौं :- इनिसा विक हत्या प्रकरणमा दोषीलाई कडा कारबाहीको माग गर्दै युवाहरूले शनिबार पनि काठमाडौंमा विरोध प्रदर्शन गरेका छन्।
इनिसा विकको हत्या प्रकरणको निष्पक्ष छानबिन गरी दोषीलाई कडा भन्दा कडा कारबाही गर्नुपर्ने माग गर्दै युवाहरूको एक समूहले माइतीघरदेखि बानेश्वरसम्म प्रदर्शन गरेका हुन्। प्रदर्शनका क्रममा उनीहरूले बलात्कारका दोषीलाई फाँसीको सजाय दिने कानुन बनाउनुपर्ने मागसमेत गरेका थिए।
प्रदर्शनकारीहरूले “महिला तथा दलितमाथिको हिंसा अन्त्य गर”, “पीडितलाई न्याय दे” लगायतका नाराबाजी गर्दै दोषीमाथि कडा कारबाही गर्न सरकारसँग माग गरेका छन्।
सुर्खेतको वीरेन्द्रनगरस्थित सामुदायिक वन क्षेत्रमा इनिसा विक मृत अवस्थामा फेला परेकी थिइन्। पोस्टमार्टम रिपोर्टमा बलात्कारपछि अत्यधिक रक्तस्रावका कारण उनको मृत्यु भएको उल्लेख भएपछि प्रहरीले घटनाको अनुसन्धान तीव्र बनाएको जनाएको छ।
