काठमाडौं :- राष्ट्रिय स्वतन्त्र पार्टी (रास्वपा) का वरिष्ठ नेता तथा भावी प्रधानमन्त्री बालेन साहले नयाँ सरकार गठनका लागि आन्तरिक गृहकार्य सुरु गरेका छन्। स्रोतका अनुसार सरकारको स्वरूप, आकार तथा मन्त्री चयनबारे पार्टीभित्र छलफल चलिरहेको छ।
हालै सम्पन्न प्रतिनिधिसभा निर्वाचनमा रास्वपाले स्पष्ट बहुमत प्राप्त गरेको छ। प्रत्यक्षतर्फ १२५ र समानुपातिकतर्फ ५७ गरी १८२ सांसदको समर्थनमा बालेन प्रधानमन्त्री बन्ने तयारीमा छन्। थप दुई सांसदको समर्थन प्राप्त भएमा दुई तिहाइ बहुमत पुग्ने भएकाले उनी नेपालको संसदीय इतिहासमै शक्तिशाली प्रधानमन्त्री बन्ने सम्भावना देखिएको छ।
समानुपातिकतर्फको संख्या लगभग निश्चित भए पनि कुन सांसदलाई कुन मन्त्रालय दिने भन्ने निर्णय भने अझै टुंगिएको छैन। निर्वाचन आयोगबाट अन्तिम विवरण प्राप्त भएपछि रास्वपाले पार्टी बैठकमार्फत औपचारिक निर्णय गर्ने तयारी गरेको स्रोतले जनाएको छ।
बालेनले संसदबाहिरबाट विज्ञलाई मन्त्री बनाउने चर्चा चले पनि पार्टी स्रोतका अनुसार तत्काल त्यस्तो सम्भावना देखिएको छैन। संवैधानिक प्रावधानअनुसार गैरसांसदलाई पनि मन्त्री बनाउन सकिने भए पनि उनी ६ महिनाभित्र सांसद बन्नुपर्ने व्यवस्था रहेको छ। हालको परिस्थितिमा त्यसो गर्न कठिन हुने भएकाले यस्तो विकल्प नअपनाइने स्रोतको भनाइ छ।
स्रोतका अनुसार बालेनले सांसदहरूमध्येबाट क्षमता, अनुभव र विषयगत दक्षता हेरेर मन्त्री छनोट गर्ने योजना बनाएका छन्। साथै, उनले मन्त्रालयको संख्या घटाउने सोच पनि बनाएका छन्। संविधानअनुसार सरकारमा अधिकतम २५ मन्त्री हुन सक्ने व्यवस्था भए पनि हाल रहेका २२ मन्त्रालयलाई घटाएर १४–१५ मा सीमित गर्ने योजना रहेको बताइएको छ।
विगतमा प्रशासन सुधार सुझाव आयोग तथा अघिल्लो सरकारको आर्थिक सुधारसम्बन्धी कार्यदलले पनि मन्त्रालय संख्या घटाउन सुझाव दिएका थिए। उक्त कार्यदलका संयोजक डा. रामेश्वर खनाल हाल अन्तरिम सरकारका अर्थमन्त्री रहेका छन्।
