विराटनगर :- सुनसरीको कोशी गाउँपालिका–१ मा सशस्त्र प्रहरीको गोली लागेर स्थानीय ४५ वर्षीय विजय साहको मृत्यु भएपछि उत्पन्न तनाव पाँच बुँदे सहमतिसँगै अन्त्य भएको छ।
बुधबार राति करिब १ बजे भारतबाट सिटी सफारीमा सामान लिएर नेपाल फर्कँदै गरेका साहमाथि सशस्त्र प्रहरीले गोली चलाउँदा उनको घटनास्थलमै मृत्यु भएको थियो। घटनापछि स्थानीय बासिन्दा र पीडित पक्ष आन्दोलित बनेका थिए। आन्दोलनका क्रममा स्थानीय र प्रहरीबीच झडप हुनुका साथै सशस्त्र प्रहरीको सीमा सुरक्षा पोष्टमा समेत आक्रमण भएको थियो।
बिहीबार जिल्ला प्रशासन कार्यालय सुनसरीमा पीडित पक्ष, सुरक्षा निकाय र प्रशासनबीच भएको वार्तामा घटनाको छानबिन गर्ने, मृतक परिवारलाई उचित क्षतिपूर्ति दिने तथा रोजगारीको व्यवस्था गर्ने विषयमा पाँच बुँदे सहमति जुटेको हो।
सहमतिपछि अवस्था सामान्य बनाउने प्रयास भइरहेको जिल्ला प्रहरी कार्यालय सुनसरीका प्रवक्ता डीएसपी चन्द्र खड्काले जानकारी दिए।
सहमतिका मुख्य बुँदा यस्ता छन् :
१- छानबिन समिति गठन
घटनाको सत्यतथ्य पत्ता लगाउन सहायक प्रमुख जिल्ला अधिकारीको संयोजकत्वमा सात सदस्यीय छानबिन समिति गठन गरिएको छ। समितिमा नेपाल प्रहरीका प्रहरी नायब उपरीक्षक र राष्ट्रिय अनुसन्धान जिल्ला कार्यालयका अधिकृत प्रतिनिधि सदस्य रहनेछन्। समितिलाई सात दिनभित्र प्रतिवेदन बुझाउने समय दिइएको छ।
२- क्षतिपूर्तिको सिफारिस
छानबिन प्रतिवेदनमा सुरक्षा अधिकारीको लापरबाही देखिएमा नियमानुसार राहत तथा क्षतिपूर्तिका लागि गृह मन्त्रालयमा सिफारिस गरिनेछ।
३-रोजगारीको व्यवस्था
मृतक विजय साहकी श्रीमतीलाई रोजगारी उपलब्ध गराउन प्रमुख जिल्ला अधिकारीले आवश्यक पहल र सहजीकरण गर्ने सहमति भएको छ।
४-छोरालाई सशस्त्र प्रहरीमा भर्ना सहयोग
मृतकका छोराले सशस्त्र प्रहरीमा भर्ना हुने इच्छा व्यक्त गरेमा सशस्त्र प्रहरी बल नम्बर १ बराह बाहिनीले नियमानुसार आवश्यक सहयोग र सहजीकरण गर्ने सहमति गरिएको छ।
५-शव व्यवस्थापन
सहमति भएसँगै मृतकको शव पोस्टमार्टमका लागि नेपाल प्रहरीलाई बुझाइने र त्यसपछि परिवारले दाहसंस्कार गर्ने व्यवस्था मिलाइएको छ।
सहमति पत्रमा स्थानीय प्रतिनिधि, सुरक्षा निकायका प्रमुख तथा पीडित पक्षका प्रतिनिधिहरूले हस्ताक्षर गरेका छन्।
