भैरहवा :- पर्यटन विकासको ठूलो सम्भावना बोकेको लुम्बिनी प्रदेशको प्रवेशद्वारका रूपमा रहेको भैरहवास्थित पर्यटन कार्यालयले आन्तरिक तथा बाह्य पर्यटकलाई सेवा प्रवाह गर्ने महत्वपूर्ण जिम्मेवारी निर्वाह गर्दै आएको छ। गौतम बुद्ध अन्तर्राष्ट्रिय विमानस्थल सञ्चालनमा आएसँगै यस कार्यालयको भूमिका थप महत्वपूर्ण बन्दै गएको छ भने अपेक्षा पनि उल्लेखनीय रूपमा बढेको छ।
पर्यटन कार्यालय भैरहवाका सूचना अधिकारी तारा प्रसाद खनालका अनुसार सीमित स्रोत–साधनका बाबजुद कार्यालयले पर्यटकमैत्री सेवा दिन निरन्तर प्रयास गरिरहेको छ। “पर्यटकलाई आवश्यक सूचना प्रदान गर्नु, गन्तव्यबारे जानकारी दिनु र सहजीकरण गर्नु हाम्रो प्रमुख दायित्व हो,” खनालले बताए।
हाल पर्यटन कार्यालय पर्याप्त जनशक्तिको अभाव, सीमित भौतिक संरचना र प्रविधिको कमीका बीच सञ्चालनमा छ। पर्यटकको चाप बढ्दै गए पनि आवश्यक दरबन्दी नहुँदा सेवा प्रवाहमा कहिलेकाहीँ ढिलाइ हुने गरेको कार्यालयले स्वीकार गरेको छ।
कार्यालयले भोगिरहेका प्रमुख चुनौतीमा पर्याप्त बजेटको अभाव, जनशक्तिको कमी, पर्यटकीय सूचना अद्यावधिक गर्न कठिनाइ तथा निजी क्षेत्र र स्थानीय तहसँग प्रभावकारी समन्वयको कमी रहेका छन्। विशेषगरी सीमा नाका हुँदै आउने पर्यटकलाई व्यवस्थित सूचना प्रणालीमार्फत सेवा दिन नसक्नु अर्को चुनौतीका रूपमा देखिएको छ।
“हामीसँग योजना छन्, तर कार्यान्वयनका लागि स्रोत आवश्यक छ,” खनालले भने, “पर्यटन प्रवर्द्धनका कार्यक्रमलाई निरन्तरता दिन नसक्दा अपेक्षित उपलब्धि हासिल गर्न कठिन भइरहेको छ।”
चुनौतीका बीच पनि कार्यालयले सूचना कक्ष सञ्चालन, प्रचार सामग्री वितरण, पर्यटन व्यवसायीसँग समन्वय तथा पर्यटक गुनासो सुनुवाइ जस्ता सेवाहरू निरन्तर प्रदान गर्दै आएको छ। पछिल्लो समय डिजिटल माध्यमको प्रयोगमार्फत सूचना प्रवाहलाई सहज बनाउने प्रयाससमेत सुरु गरिएको कार्यालयले जनाएको छ।
पर्यटन कार्यालय भैरहवाले संघ, प्रदेश र स्थानीय तहबीचको सहकार्य प्रभावकारी भएमा सेवा प्रवाह अझ सुदृढ बन्ने विश्वास लिएको छ। पर्याप्त बजेट, प्रविधि र जनशक्ति व्यवस्थापन गर्न सके भैरहवा मात्र होइन, समग्र लुम्बिनी क्षेत्रको पर्यटन विकासमा ठोस योगदान पुग्ने अपेक्षा गरिएको छ।
