काठमाडौँ :- नेपालको डिजिटल रूपान्तरणका लागि विश्व बैंकले ५ करोड अमेरिकी डलर (करिब ७ अर्ब २३ करोड रुपैयाँ) ऋण उपलब्ध गराउने भएको छ। अमेरिकाको वाशिङ्टनमा बसेको विश्व बैंकको कार्यकारी निर्देशक बोर्डले ‘नेपाल डिजिटल ट्रान्सफर्मेशन प्रोजेक्ट’ अन्तर्गत नेपाललाई सहयोग गर्ने निर्णय गरेको हो।
यो निर्णयसँगै नेपालमा डिजिटल सार्वजनिक पूर्वाधार सुदृढीकरण र सार्वजनिक सेवाहरू डिजिटल माध्यमबाट उपलब्ध गराउने कार्यमा सहयोग परिचालन गरिनेछ। परियोजनाले नागरिकलाई प्रदान गरिने सेवाको ढाँचामा मौलिक परिवर्तन ल्याउने लक्ष्य लिएको छ।
परियोजनाअन्तर्गत एकीकृत अनलाइन नागरिक सेवा पोर्टल, सुरक्षित डेटा आदान–प्रदान प्रणाली, प्रमाणीकरण योग्य प्रमाणपत्र तथा डिजिटल वालेट व्यवस्थापन गर्न सकिने डिजिटल लकर जस्ता प्लेटफर्ममा लगानी गरिनेछ।
डिजिटल अर्थतन्त्रप्रति नागरिकको विश्वास अभिवृद्धि गर्न इलेक्ट्रोनिक हस्ताक्षर (ई–सिग्नेचर), साइबर सुरक्षा र डेटा गभर्नेन्स क्षेत्रमा समेत लगानी गरिने विश्व बैंकले जनाएको छ।
विश्व बैंकका माल्दिभ्स, नेपाल र श्रीलङ्काका लागि क्षेत्रीय निर्देशक डेभिड सिस्लेनले डिजिटल पूर्वाधारमा गरिएको लगानीले सेवा प्रवाहमा पारदर्शिता, समावेशिता र प्रभावकारिता बढ्ने बताउनुभयो।
उहाँका अनुसार मुख्य डिजिटल प्लेटफर्ममा लगानी र सेवाहरू डिजिटलाइज भएपछि नागरिक र व्यवसायलाई अझ सहज र प्रभावकारी सेवा उपलब्ध हुनेछ, जसले सार्वजनिक क्षेत्रको कार्यक्षमता र सुशासन प्रवर्द्धनमा मद्दत गर्नेछ।
यो परियोजना विश्व बैंक र एशियाली विकास बैंक (एडीबी) बीचको संयुक्त सह–वित्तीय व्यवस्थाअन्तर्गत कार्यान्वयन हुनेछ। फुल म्युचुअल रिलायन्स फ्रेमवर्क अन्तर्गत विश्व बैंक प्रमुख ऋणदाता रहनेछ भने एडीबी सह–ऋणदाताका रूपमा रहनेछ।
एडीबीले यस परियोजनामा ४० मिलियन अमेरिकी डलर योगदान गर्नेछ। एडीबी व्यवस्थापनले आउँदो मार्च महिनामा परियोजनालाई आफ्नो बोर्डमा प्रस्तुत गर्ने अपेक्षा गरिएको छ।
