बुटवल :- कालिका मानवज्ञान माध्यमिक विद्यालयको ६५औँ वार्षिक उत्सव अवसरमा सञ्चालन भएको कालिका कप–२०८२ भव्य रूपमा सम्पन्न भएको छ। जिल्ला स्तरीय भलिबल र कबड्डी प्रतियोगितामा विद्यालयस्तरका टोलीहरूले प्रतिस्पर्धात्मक खेल प्रदर्शन गर्दै खेलकुद उत्सवलाई स्मरणीय बनाएका छन्।
छात्र भलिबलतर्फ न्यु होराइजन माविले उत्कृष्ट प्रदर्शन गर्दै उपाधि जितेको छ। फाइनलमा पराजित मणिमुकुन्द मावि उपविजेतामा सीमित रहँदा नविन माविले तेस्रो स्थान हासिल गर्यो। छात्रा भलिबलतर्फ एभरेष्ट माविले उपाधि आफ्नो नाममा लेखायो भने न्यु होराइजन मावि दोस्रो र कुवरवर्ती मावि तेस्रो स्थानमा रहे।
कबड्डीतर्फ छात्र समूहमा आयोजक कालिका मानवज्ञान माविले घरेलु मैदानको फाइदा उठाउँदै पहिलो स्थान हात पार्यो। नविन औद्योगिक मावि दोस्रो हुँदा मणिमुकुन्द मावि र न्यु होराइजन गौतम बुद्ध मावि संयुक्त रूपमा तेस्रो भए। छात्रा कबड्डीमा भने न्यु होराइजन माविले उपाधि जित्दा कालिका मानवज्ञान मावि उपविजेता बन्यो। कान्ती मावि र नविन औद्योगिक माविले तेस्रो स्थान प्राप्त गरे।
प्रतियोगितासँगै उत्कृष्ट खेलाडी र प्रशिक्षकहरू पनि सम्मानित भएका छन्। भलिबलतर्फ बेष्ट कोच न्यु होराइजनका प्रदीप चौधरी र एभरेष्ट स्कुलका अर्जुन घिमिरे घोषित भए। बेष्ट प्लेयरमा न्यु होराइजनका अनिश थापा र एभरेष्टकी मिना सुनार छानिइन्। बेष्ट ब्लकर, स्पाइकर, डिफेन्स, सर्भिसर, सेटर र राइजिङ प्लेयर विधामा विभिन्न विद्यालयका खेलाडीहरू पुरस्कृत भए।
कबड्डीतर्फ बेष्ट राइडर कालिका मानवज्ञानका आलोक हरिज र न्यु होराइजनकी क्रिस्टिना श्रेष्ठ बने भने बेष्ट डिफेन्डर आरव अन्सारी र सन्ध्या पौडेल घोषित भए। बेष्ट कोचको उपाधि कालिका मानवज्ञानका राहुल अर्याल र न्यु होराइजनका महेन्द्र सुनारले पाए।
विजेता टोलीलाई नगद ३० हजार, उपविजेतालाई २० हजार र तेस्रो हुने टोलीलाई १० हजार रुपैयाँसहित ट्रफी र मेडल प्रदान गरिएको थियो। पुरस्कार वितरण विद्यालय व्यवस्थापन समिति अध्यक्ष नित्यानन्द ज्ञवाली, शैक्षिक सल्लाहकार तथा पूर्व प्रधानाध्यापक घनश्याम पाठक, प्रधानाध्यापक दिनेश थापालगायतले गरेका थिए।
यसैबीच, वार्षिक उत्सवकै अवसरमा विद्यालयले सामाजिक उत्तरदायित्वअन्तर्गत समुदाय सरसफाइ कार्यक्रम पनि सञ्चालन गरेको छ। बुटवल–१० अन्तर्गत सेक्टर–२ रामनगर र कालिका नगर क्षेत्रमा शिक्षक, विद्यार्थी, जनप्रतिनिधि, समाजसेवी र टोल समितिका प्रतिनिधिको सहभागितामा वृहत सरसफाइ गरिएको हो। विद्यालयसँग प्रत्यक्ष जोडिएका क्षेत्रको सरसफाइ गरिएको विद्यालयका इन्चार्ज कृष्ण गौतमले जानकारी दिए।
विद्यालयले पुस ६ गते सेक्टर–२ रामनगरमा पुरस्कार वितरण तथा सम्मान कार्यक्रम र पुस ७ गते कालिका नगर सेक्टर–१ मा मुख्य समारोह आयोजना गर्ने जनाएको छ। खेलकुद, सामुदायिक सहभागिता र सामाजिक चेतनालाई एकसाथ अघि बढाएको कालिका कपले विद्यालयस्तरीय कार्यक्रमको नयाँ उदाहरण प्रस्तुत गरेको आयोजकको भनाइ छ।
