बुटवल :- भारतको गोरखपुरस्थित प्रसिद्ध प्रकाशन संस्था ‘गीताप्रेस’का धार्मिक तथा पूर्वीय दर्शन सम्बन्धी पुस्तकहरू अब बुटवलमै सजिलै उपलब्ध हुने भएका छन्। सोमबार जेसिज चोकमा आयोजित पत्रकार सम्मेलनमा नयाँ बिक्री केन्द्र सञ्चालनमा आएको जानकारी दिइएको हो।
यसअघि गीताप्रेसका पुस्तकहरू किन्न पाठकहरूलाई काठमाडौँ वा भारतको गोरखपुरसम्म जानुपर्ने बाध्यता थियो। तर अब बुटवल शाखा खुलेसँगै पश्चिम नेपालका पाठकले आफ्नै शहरबाटै पुस्तकहरू खरीद गर्न सक्नेछन्।
बिक्री केन्द्रका सञ्चालक तथा विश्व हिन्दु महासंघका वरिष्ठ उपाध्यक्ष शंकर खरालका अनुसार मंसिर १० गते बुधबार नयाँ केन्द्रको औपचारिक उद्घाटन गरिनेछ। केन्द्रमा गीताप्रेसद्वारा प्रकाशित पुस्तकहरू दुई रुपैयाँदेखि तीन हजार भारतीय रुपैयाँसम्मको मूल्यमा उपलब्ध हुनेछन्। करिब तीन हजार प्रकारका पुस्तकमध्ये झन्डै एक हजार पाँच सय पुस्तकहरू बुटवल शाखामा पाइने जानकारी पनि दिइयो।
शंकर खरालका अनुसार केन्द्रमा १८ पुराण, उपनिषद, धर्मशास्त्र, संस्कृत व्याकरण, बालबालिका पुस्तक तथा कथा–काव्यजस्ता सामग्री उपलब्ध हुनेछ। नेपाली, संस्कृत, हिन्दी र अंग्रेजी भाषाका पुस्तकहरू पाठकको माग अनुसार प्राप्त गर्न सकिने व्यवस्था गरिएको छ।
उद्घाटन कार्यक्रममा विश्व ज्योतिष महासंघका अध्यक्ष तथा धार्मिक अभियन्ता जनार्दन न्यौपानेले बुटवलमा गीताप्रेसको शाखा स्थापना हुनु पश्चिम क्षेत्रका पाठक र भक्तजनका लागि ठूलो उपलब्धि भएको बताए। नारायणी नदीको पश्चिम भूभागमा बस्ने पाठकहरूले अब यात्रा नगरी आवश्यक पुस्तकहरू किन्न सक्ने भएकाले पुर्वीय दर्शन अध्ययन अझै सुलभ हुने उनले उल्लेख गरे।
कार्यक्रममा हरि कृष्ण पूजा सामग्रीका सञ्चालक कृष्णप्रसाद खराल, गीताप्रेस बिक्री केन्द्रका सञ्चालक सतिश खराल र धार्मिक अभियन्ता सुन्दर भण्डारीले पनि बुटवलमा खुलेको केन्द्रले धार्मिक पुस्तकप्रेमी, विद्यार्थी र शोधकर्तालाई ज्ञान प्राप्तिमा सहजता प्रदान गर्ने विश्वास व्यक्त गरे।
यस शाखाले न केवल पुस्तक खरिदका लागि सुविधा दिनेछ, तर धार्मिक, आध्यात्मिक र पूर्वीय दर्शन बुझ्न चाहने समुदायका लागि पनि महत्वपूर्ण केन्द्रको रूपमा विकसित हुने अपेक्षा गरिएको छ।
