गुल्मी:- गुल्मीमा १० दिनदेखि हराएकी ४० वर्षीया महिला मृत अवस्थामा फेला परेकी छन्। धुर्कोट गाउँपालिका–६ रजस्थलकी सीता थापा वडा नम्बर ५ बस्तुस्थित कुम्ला बनडाँडाको खाली घरमा मृत भेटिएको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुले जानकारी दिएका छन्।
धुर्कोट–६ रजस्थल लाहातामा बस्ने ४२ वर्षीय घनश्याम थापाकी श्रीमती सीता थापा कार्तिक २६ गते दिउँसो २ बजे घरबाट कसैलाई नभनी निस्किएकी थिइन्। उनी हराएपछि मंसिर ४ गते प्रहरी चौकीमा आफन्तहरूले मौखिक रूपमा खोजी निवेदन दिएका थिए।
प्रहरीका अनुसार खोजतलासका क्रममा उनी धुर्कोट–५ बस्तुको कुम्ला बनडाँडामा रहेको एक खाली घरभित्र मृत अवस्थामा फेला परेकी हुन्।
मृतकको शव सडेगलेको अवस्थामा फेला परेको प्रहरीले बताएको छ।
घटनास्थलमा प्रहरी चौकी धुर्कोट बस्तुबाट प्रहरी सहायक निरीक्षक शारदा भट्टको कमाण्डमा दुई जनाको टोली र इलाका प्रहरी कार्यालय पुर्कोटदहबाट प्रहरी निरीक्षक रेवन्त सेनको कमाण्डमा पाँच जनाको टोली खटिएको थियो।
घटनाबारे थप अनुसन्धान भइरहेको जिल्ला प्रहरी कार्यालय गुल्मीले जनाएको छ।
