बुटवल :- सार्वजनिक स्थानको सरसफाइलाई एक दिनको कार्यक्रममै सीमित नराखी नियमित अभियानका रूपमा अघि बढाएको लियो क्लब अफ बुटवल गोल्डेन जुबिलीको बुटवल बसपार्क सरसफाइ अभियान छैटौं हप्तामा प्रवेश गरेको छ।
‘हरेक शनिबार बिहान, सफा रहोस् हाम्रो बुटवल’ भन्ने नारासहित क्लबका पदाधिकारी तथा सदस्यहरू हरेक शनिबार बिहान बसपार्क क्षेत्रमा पुगेर सरसफाइ गर्दै आएका छन्। अभियानको छैटौं हप्तामा पनि शनिबार बिहान उनीहरूले बसपार्क क्षेत्रका सडक तथा सार्वजनिक स्थानमा जम्मा भएको फोहोर संकलन गरी सरसफाइ गरेका हुन्।
अभियानमा क्लबका अध्यक्ष लक्ष्मण खनाल, पूर्वअध्यक्ष गोकुल भण्डारीलगायत पदाधिकारी तथा सदस्यहरूको सहभागिता रहेको थियो।
बुटवल बसपार्क दैनिक ठूलो संख्यामा यात्रु तथा सर्वसाधारणको आवतजावत हुने क्षेत्र भएकाले यसको सरसफाइ र व्यवस्थापनमा नियमित ध्यान आवश्यक रहेको क्लबले जनाएको छ। यही आवश्यकतालाई ध्यानमा राखेर एकपटकको औपचारिक कार्यक्रमभन्दा नियमित अभियानका रूपमा सरसफाइलाई निरन्तरता दिइएको क्लबको भनाइ छ।
क्लबका पदाधिकारीहरूले शहर सफा राख्ने जिम्मेवारी स्थानीय सरकार वा कुनै एउटा संघसंस्थाको मात्रै नभई प्रत्येक नागरिकको समेत भएको बताएका छन्। सार्वजनिक स्थानमा जथाभावी फोहोर नफाल्न र आफ्नो वरपरको क्षेत्र सफा राख्न उनीहरूले सर्वसाधारणसँग आग्रह गरेका छन्।
सरसफाइसँगै नागरिकमा ‘आफ्नो फोहोर, आफ्नै जिम्मेवारी’ भन्ने चेतना विकास गर्नु अभियानको अर्को उद्देश्य रहेको क्लबले जनाएको छ। समुदायको सहभागिता बढाउन सके मात्रै सार्वजनिक स्थानलाई दीर्घकालीन रूपमा सफा र व्यवस्थित राख्न सकिने क्लबको धारणा छ।
छ हप्तादेखि लगातार सञ्चालन भइरहेको अभियानलाई आगामी शनिबार पनि निरन्तरता दिइने क्लबले जनाएको छ। नियमित सरसफाइमार्फत बसपार्कको वातावरण सुधार गर्नुका साथै बुटवललाई सफा, स्वच्छ र व्यवस्थित शहर बनाउने अभियानमा समुदायलाई समेत जोड्ने क्लबको लक्ष्य छ।
एक शनिबारको सरसफाइबाट सुरु भएको अभियान छैटौं हप्तासम्म आइपुग्दा क्लबले ‘कार्यक्रम होइन, निरन्तरता’लाई प्राथमिकता दिएको देखिएको छ।
