काठमाडौं :-प्रयोगकर्ताको स्पष्ट अनुमति र पर्याप्त जानकारीबिना मोबाइलको फोटो तथा भिडियो ग्यालरीमा पहुँच गरेको भन्दै इटालीको डेटा संरक्षण निकायले फेसबुकको मातृ कम्पनी मेटालाई ८० करोड ५० लाख युरो (करिब १ खर्ब ३३ अर्ब रुपैयाँ) जरिबाना गरेको छ।

इटालीको डेटा संरक्षण प्राधिकरणका अनुसार फेसबुकको एन्ड्रोइड एपले प्रयोगकर्ताको स्मार्टफोनमा रहेका फोटो, भिडियो तथा तिनसँग सम्बन्धित मेटाडेटामा छुट्टै र स्पष्ट सहमतिबिना पहुँच बनाएको थियो।
‘ग्यालरीबाट सुझाव प्राप्त गर्ने’ नामको उक्त सुविधा सन् २०२३ देखि उपलब्ध थियो। फेसबुक चलाइरहेका बेला प्रयोगकर्ताको मोबाइल ग्यालरीमा रहेका तस्बिर तथा भिडियो पोस्ट गर्न सुझावका रूपमा देखाउने यो सुविधा पूर्वनिर्धारित रूपमा सक्रिय रहने गरेको अनुसन्धानबाट खुलेको प्राधिकरणले जनाएको छ।

प्रयोगकर्ताले एपका विभिन्न सुविधाका लागि एउटै अनुमति दिँदा ग्यालरीमा समेत पहुँच खुल्ने व्यवस्था रहेको र त्यसबारे पर्याप्त जानकारी नदिइएको नियामकको निष्कर्ष छ।
इटालीको प्राधिकरणका अनुसार यसबाट देशका करिब दुई करोड एन्ड्रोइड प्रयोगकर्ता प्रभावित हुन सक्नेछन्।
निर्णयअनुसार मेटाले अब ६० दिनभित्र उक्त सुविधा पूर्वनिर्धारित रूपमा बन्द गर्नुपर्नेछ। साथै, फोटो ग्यालरीमा पहुँचका लागि छुट्टै र स्पष्ट सहमति लिनुपर्ने तथा प्रयोगकर्तालाई सुविधा कसरी बन्द गर्ने भन्ने जानकारी दिनुपर्नेछ।
यता मेटाले भने नियामकको निर्णयप्रति असहमति जनाउँदै जरिबाना अत्यधिक भएको बताएको छ। कम्पनीले उक्त निर्णयविरुद्ध अपिल गर्ने जनाएको छ।
यो अनुसन्धान प्रयोगकर्ताका तस्बिर कृत्रिम बुद्धिमत्ता (एआई) तालिममा प्रयोग गरिएको विषयमा भने केन्द्रित थिएन।


