भैरहवा:- रुपन्देहीको सिद्धार्थनगर नगरपालिका–१, बेलहिया बसपार्क नजिक रहेको एक होटलबाट अवैध भीओआइपी (VOIP) कल बाइपास गरिरहेको आरोपमा एक जनालाई प्रहरीले पक्राउ गरेको छ।
विशेष सूचना र लामो समयको निगरानीपछि जिल्ला प्रहरी कार्यालय रुपन्देही र इलाका प्रहरी कार्यालय बेलहियाको संयुक्त टोलीले बुधबार साँझ छापा मारेर गोरखाको चुमनुव्री गाउँपालिका–४ स्थायी घर भएका ६२ वर्षीय छिरिङ गुरुङलाई पक्राउ गरेको हो।
प्रहरीका अनुसार गुरुङ बेलहियास्थित ‘न्यु मुक्ति होटल एन्ड रेस्टुरेन्ट’को दोस्रो तलामा कोठा भाडामा लिएर बस्दै आएका थिए। खानतलासीका क्रममा प्रहरीले भीओआइपी कल बाइपासमा प्रयोग हुने दुई थान सिम डिभाइस, एउटा वर्ल्डलिङ्क राउटर, एउटा वाइफाइ–६ प्लस राउटर, तीन थान मोबाइल, १२ भोल्टको ब्याट्री, इन्भर्टर, मल्टिप्लग, आरजे–४५ केबल र टेबल पङ्खा बरामद गरेको छ।
त्यसैगरी प्रहरीले ५६ थान भारतीय सिम कार्ड, तीन थान चिनियाँ सिम, एक थान नेपाल टेलिकम (एनटीसी) सिम र ३८ थान एनसेल सिमका खोल समेत बरामद गरेको जनाएको छ।
गुरुङको साथबाट ११ हजार नेपाली रुपैयाँ, ७ हजार भारतीय रुपैयाँ, बागमती प्रदेश ०२–०२७ प ९५९७ नम्बरको स्कुटर, नेपाली नागरिकता, भारतीय निर्वाचन परिचयपत्र तथा नेपाली सवारी चालक अनुमति पत्र पनि बरामद गरिएको प्रहरीले जनाएको छ।
प्रहरीले पक्राउ परेका गुरुङविरुद्ध दूरसञ्चार ऐन, २०५३ अन्तर्गत अवैध भीओआइपी कल बाइपाससम्बन्धी कसुरमा अनुसन्धान अघि बढाएको छ। रुपन्देही जिल्ला अदालतबाट साउन १४ गते पाँच दिनको म्याद थप गरी घटनाबारे थप अनुसन्धान भइरहेको प्रहरीले जनाएको छ।
