बुटवल :- नेपाली कांग्रेसको १५औँ महाधिवेशनअन्तर्गत रुपन्देही क्षेत्र नं. २ बाट युवा नेता तथा व्यवसायी भेषराज पोखरेल ‘राज’ले ३५ वर्षमुनिको युवा क्लस्टरतर्फ केन्द्रीय महाधिवेशन प्रतिनिधि पदमा उम्मेदवारी घोषणा गरेका छन्।
नेपाल विद्यार्थी संघ हुँदै कांग्रेसको राजनीतिमा सक्रिय पोखरेलले पार्टी संगठनमा युवा सहभागिता बढाउने र नयाँ पुस्ताको सोचलाई नेतृत्व तथा निर्णय प्रक्रियासँग जोड्ने उद्देश्यसहित उम्मेदवारी दिएको बताएका छन्।
‘युवाको सोच, समृद्ध समाज र सशक्त नेपाली कांग्रेस’ भन्ने अवधारणालाई अघि सारेका पोखरेलले पार्टीका क्षेत्रीय प्रतिनिधिसँग आफ्नो उम्मेदवारीका पक्षमा समर्थन मागेका छन्।
पोखरेलको राजनीतिक सक्रियता विद्यार्थी राजनीतिबाट सुरु भएको हो। नेपाल तरुण दल बुटवल–११ मतदान केन्द्र ‘क’को संस्थापक सभापति रहेका उनी तरुण दल बुटवल उपमहानगर समितिको सदस्यसमेत भइसकेको उनको विवरणमा उल्लेख छ।
नेपाली कांग्रेसको १४औँ महाधिवेशनमा उनी बुटवल–११ बाट क्षेत्रीय प्रतिनिधिमा निर्वाचित भएका थिए। सोही महाधिवेशन प्रक्रियामा रुपन्देही क्षेत्र नं. २ प्रदेशसभा ‘क’को सहसचिव पदमा समेत उनको उम्मेदवारी थियो। तत्कालीन सार्वजनिक समाचारमा पनि पोखरेल उक्त पदका उम्मेदवार रहेको उल्लेख छ।
लुम्बिनी प्रदेशको राजधानी बुटवलबाट दाङ सार्ने निर्णयविरुद्ध कांग्रेसको आह्वानमा भएको आन्दोलनमा सहभागी हुँदा आफूले मुद्दासमेत खेपेको पोखरेलले बताएका छन्।
राजनीतिसँगै सामाजिक, युवा तथा व्यावसायिक क्षेत्रमा पनि आफ्नो सक्रियता रहेको उनले जनाएका छन्। उनी समग्र बचत तथा ऋण सहकारी संस्थाको सचिव तथा हिमाली कृषि सहकारी संस्था लिमिटेड बुटवल–११ को पूर्वलेखा समिति संयोजक हुन्।
युवा तथा सामाजिक संस्थातर्फ उनी लियो क्लब अफ बुटवल गोल्डेन जुब्लीका संस्थापक अध्यक्ष हुन्। लियो जिल्ला परिषद् ३२५ ‘पी’ नेपाल वर्ष २०२५/२६ मा सल्लाहकारको जिम्मेवारीमा रहेको तथा लायन्स क्लब अफ बुटवल मणिमुकुन्द युथमा पनि आबद्ध रहेको उनको विवरणमा उल्लेख छ।
पोखरेल रोटर्याक्ट क्लब अफ बुटवलको वर्ष २०२७/२८ का लागि निर्वाचित अध्यक्ष तथा बुटवल जेसीजको वर्ष २०२६/२७ का प्रोग्राम डाइरेक्टरसमेत रहेको बताएका छन्।
व्यावसायिक क्षेत्रमा पनि सक्रिय पोखरेल बुटवल अटोमोबाइल्स, बुटवल मोटर्स प्रालि र समृद्धि ट्रेडर्ससँग आबद्ध छन्। बुटवल उद्योग वाणिज्य संघको अटोमोबाइल्स वस्तुगत उपसमितिमा सहसचिवका रूपमा काम गरेको तथा नेपाल अटोमोबाइल्स ट्रेड युनियन बुटवल उपमहानगर समितिमा समेत आबद्ध रहेको उनको विवरणमा उल्लेख छ।
राजनीति, व्यवसाय र विभिन्न सामाजिक संस्थामा हासिल गरेको अनुभवलाई पार्टी संगठनसँग जोड्ने आफ्नो योजना रहेको पोखरेलले बताएका छन्। उनले युवाको प्रतिनिधित्वलाई केवल उमेरको विषय नभई संगठनको नीति, निर्णय र नेतृत्व प्रक्रियामा नयाँ पुस्ताको अर्थपूर्ण सहभागितासँग जोडिनुपर्ने धारणा राखेका छन्।
रुपन्देही क्षेत्र नं. २ बाट युवा क्लस्टरतर्फ उम्मेदवारी घोषणा गरेका पोखरेलले अब क्षेत्रीय प्रतिनिधिहरूसँग भेटघाट र संवादमार्फत आफ्नो एजेन्डा अघि बढाउने बताएका छन्। अन्तिम उम्मेदवारको सूची र प्रतिस्पर्धाको स्वरूप भने कांग्रेसको सम्बन्धित निर्वाचन प्रक्रिया अघि बढेसँगै स्पष्ट हुनेछ।
