काठमाडौं :- नेपाली कांग्रेसका महामन्त्री प्रदीप पौडेल ले सर्वोच्च अदालतको फैसलालाई कसैको जित वा हारको रूपमा व्याख्या नगर्न आग्रह गरेका छन्।
सर्वोच्च अदालतले विशेष महाधिवेशनबाट निर्वाचित गगन थापा नेतृत्वको कार्यसमितिलाई वैधानिकता दिएपछि पौडेलले सामाजिक सञ्जालमार्फत यस्तो प्रतिक्रिया दिएका हुन्।
उनले अदालतको फैसलालाई सम्मानपूर्वक स्वीकार गर्नुपर्ने उल्लेख गर्दै यसलाई विवाद वा विभाजनको विषय नबनाउन सबैलाई सचेत रहन आग्रह गरेका छन्। “यो कसैको जित वा हारको विषय होइन,” उनले भनेका छन्, “यसलाई त्यही रूपमा व्याख्या गर्दा पार्टी एकता खलबलिन सक्छ।”
पौडेलले वर्तमान अवस्थामा पार्टीभित्र एकता कायम राख्नु अत्यन्त आवश्यक रहेको औंल्याउँदै सबै नेताकार्यकर्तालाई संयमित रहन अपिल गरेका छन्।
उनले आगामी १५औँ महाधिवेशनलाई ध्यानमा राख्दै सबैलाई सुरक्षित र समेटिएको महसुस हुने वातावरण निर्माण गर्नुपर्नेमा जोड दिएका छन्। साथै, चारतारे झण्डामुनि पुनः एकताबद्ध भएर अघि बढ्न उनले आग्रह गरेका छन्।
