बुटवल:-फर्वाड नेपाल मल्टीपर्पोज कम्पनी प्रा. लि र जयमाता दीको सहकार्यमा सञ्चालन भइरहेको बुटवल महा मेला २०८२’ ले सुरुवाती चुनौती पार गर्दै अहिले दर्शकको उल्लेख्य साथ पाउन सफल भएको छ। हालसम्म करिब ३० हजारभन्दा बढी दर्शकले मेला अवलोकन गरिसकेका छन्।
मेला प्रारम्भ भएसँगै आएको हावाहुरीका कारण केही दिन स्टल व्यवस्थापन तथा दर्शक आवतजावतमा असर परेको थियो। तर आयोजकको सक्रिय व्यवस्थापनपछि अहिले मेला पुनः व्यवस्थित रूपमा सञ्चालन भइरहेको छ।
मेला समितिका अध्यक्ष गोविन्द भुसाल का अनुसार लगातार तीन दिनको सार्वजनिक बिदाले दर्शक संख्या अझ बढ्ने अपेक्षा गरिएको छ। पछिल्ला दिनहरूमा मेलाप्रति आकर्षण बढ्दै गएको उनको भनाइ छ।
मेलामा कृषि औजार, स्थानीय तथा परम्परागत परिकारसहितका होटल, विभिन्न व्यापारिक स्टलहरू राखिएका छन्। यसले स्थानीय उत्पादनको प्रवर्द्धनसँगै दर्शकलाई किनमेल तथा मनोरञ्जनको अवसर प्रदान गरेको छ।
सुरक्षालाई प्राथमिकतामा राख्दै मेला हरेक दिन राति ९ बजेसम्म सञ्चालन गरिँदै आएको छ। साथै, सम्बन्धित निकायबाट नियमित अनुगमनसमेत भइरहेको छ, जसले मेलालाई थप व्यवस्थित र सुरक्षित बनाएको आयोजकले जनाएको छ।
समग्रमा, सुरुवाती प्राकृतिक चुनौतीका बाबजुद ‘सही मोल बुटवल महा मेला २०८२’ दर्शकको उत्साहजनक उपस्थितिसँगै सफलताका साथ अघि बढिरहेको छ।
