काठमाडौं :- राष्ट्रिय विपद् जोखिम न्यूनीकरण तथा व्यवस्थापन प्राधिकरणले देशका विभिन्न क्षेत्रमा तीव्र हावाहुरी र वर्षाको सम्भावना रहेको भन्दै सर्वसाधारणलाई सतर्क रहन आग्रह गरेको छ।
जल तथा मौसम विज्ञान विभागको आगामी तीन दिनको मौसम पूर्वानुमान अनुसार चैत ६ गते शुक्रबारदेखि कर्णाली र सुदूरपश्चिम प्रदेशका पहाडी तथा हिमाली भूभागका एक–दुई स्थानमा भारी वर्षा तथा हिमपात हुने सम्भावना रहेको छ।
त्यस्तै लुम्बिनी प्रदेशका दाङ र नेपालगञ्ज आसपासका तराई क्षेत्र तथा शनिबार पूर्वी क्षेत्रका विराटनगर, धनकुटा र धरान आसपासका जिल्लामा करिब ७० किलोमिटर प्रतिघण्टासम्मको तीव्र हावाहुरी चल्ने सम्भावना रहेको जनाइएको छ।
प्राधिकरणका अनुसार यस्तो हावाहुरीका कारण रुख ढल्ने, कमजोर संरचना तथा घरका छाना उड्ने, विद्युत् तथा सञ्चार सेवा प्रभावित हुने जोखिम उच्च छ। पछिल्ला दिनमा हावाहुरीका कारण मानवीय क्षति समेत भएको उल्लेख गरिएको छ।
सुरक्षाका लागि सर्वसाधारणलाई अनावश्यक यात्रा नगर्न, हावाहुरीका बेला घरका झ्यालढोका मजबुत रूपमा बन्द गर्न, आगोका स्रोत सुरक्षित राख्न तथा सवारी साधन सुरक्षित स्थानमा राख्न आग्रह गरिएको छ।
साथै खुला स्थान, रुखमुनि, बिजुलीका तार तथा टेलिफोनका खम्बा नजिक नबस्न पनि अनुरोध गरिएको छ।
प्राधिकरणले मौसमसम्बन्धी अद्यावधिक सूचना नियमित रूपमा हेरी आवश्यक सतर्कता अपनाउन सबैमा अपिल गरेको छ।
