गुल्मी :- प्रतिनिधि सभा निर्वाचनको रिपोर्टिङका क्रममा गुल्मीमा पत्रकारमाथि दुर्व्यवहार भएको छ। गुल्मी–१ अन्तर्गत सत्यवती गाउँपालिका–५ स्थित सत्यवती माध्यमिक विद्यालयको मतदान केन्द्रमा पुगेका पत्रकारहरूलाई केही स्थानीय व्यक्तिहरूले अवरोध गर्दै अपमानजनक व्यवहार गरेका हुन्।
समाचार संकलनका लागि पुगेका पत्रकार सन्तकुमार श्रेष्ठ, शंकर भुसाल र अर्जुन खत्रीलाई मादक पदार्थ सेवन गरेका केही व्यक्तिहरूले दुर्व्यवहार गरेका थिए। उनीहरूले पत्रकारहरूलाई “तिमीहरू को हौ खोस्टो भिरेर आउने?” भन्दै आक्रोश व्यक्त गर्दै रिपोर्टिङमा अवरोध गरेका थिए।
पत्रकारहरूले मतदान केन्द्रको अवस्थाबारे जानकारी लिन खोज्दा मतदान अधिकृतले समेत आवश्यक सूचना दिन अस्वीकार गरेको बताएका छन्। यस्तै, समाचार प्रयोजनका लागि भिडियो तथा दृश्य खिच्न खोज्दा पनि “तिमीहरूले खिच्न पाउँदैनौ” भन्दै अवरोध गरिएको पत्रकारहरूले बताएका छन्।
केही समय स्थिति तनावपूर्ण बनेको र स्थानीयले आक्रमण गर्ने अवस्था समेत सिर्जना भएको पत्रकारहरूले बताएका छन्। निर्वाचन जस्तो संवेदनशील समयमा पत्रकारलाई सूचना संकलनमा अवरोध गरिनु र दुर्व्यवहार हुनुप्रति सरोकारवालाहरूले चिन्ता व्यक्त गरेका छन्।
