बुटवल :- नेपाली कांग्रेस का सभापति गगनकुमार थापा ले पार्टीका नेता–कार्यकर्तालाई सामाजिक सञ्जालमा मात्र सीमित नबस्न आग्रह गरेका छन्।
रूपन्देहीको बुटवलमा शुक्रबार आयोजित चुनावी सभालाई सम्बोधन गर्दै उनले निर्वाचनको मिति नजिकिँदै गएको उल्लेख गर्दै घर–घर पुगेर प्रत्यक्ष संवाद गर्न निर्देशन दिए।
‘पार्टीका तमाम साथीहरूलाई मेरो आग्रह छ– केही दिनमात्र बाँकी छ। नअलमलिनुस् कोही पनि साथीहरू। घर–घर जानुस्,’ सभापति थापाले भने, ‘तपाईंहरू सामाजिक सञ्जालमा आफ्नो कुरा राख्नुस्। तर, सामाजिक सञ्जालमा मात्र अड्केर नबस्नुस्।’
सभापति थापाले कांग्रेसको सबैभन्दा ठूलो शक्ति संगठन भएको उल्लेख गर्दै कार्यकर्तालाई सक्रिय रूपमा प्रचार–प्रसारमा लाग्न आग्रह गरे। ‘हाम्रो सबैभन्दा ठूलो ताकत भनेको संगठनको ताकत हो।
तपाईंको गोडा चलाउनुस्, घर–घर पुग्नुस्। तपाईंको हात चलाउनुस्, गएर ढोग्नुस्। तपाईंको मुख चलाउनुस्, गएर संवाद चलाउनुस्। नौजवानहरूको कुरा सुन्नुस्,’ उनले भने।
नवयुवासँग संवाद गर्दा सुरुवातमा आलोचना वा गालीसमेत हुन सक्ने भन्दै उनले धैर्यपूर्वक संवाद गर्न सुझाव दिए। ‘उनीहरूले पहिला दुई लाइन गाली गर्लान्। उनीहरूसँग राम्रोसँग संवाद गर्नुस्,’ उनले भने, ‘उनीहरूलाई बताउनुस्– यो कांग्रेस अधिवेशनबाट एउटा नयाँ संकल्प गरेर आएको छ।’
विशेष महाधिवेशनबाट विगतका राम्रा अभ्यासलाई निरन्तरता दिँदै खराब पक्ष त्याग्ने प्रतिबद्धता पार्टीले लिएको उल्लेख गर्दै उनले कांग्रेसलाई एक अवसर दिन आग्रह गरे। ‘यो कांग्रेसले ५ वर्षभित्र परिणाम दिने प्रतिज्ञा गरेर आएको छ। यो कांग्रेसले मौका पाउनुपर्छ,’ उनले भने।
थापाले उत्तेजनाको राजनीतिमा नबहकिन चेतावनी दिँदै सामाजिक सञ्जाल र युट्युब–फेसबुकका सामग्रीबाट भ्रमित नहुन आग्रह गरे। ‘यो टेलिफोनले धेरैलाई झुक्याएको छ। धेरै भ्रममा नपरौं,’ उनले भने।
विदेशमा रहेका नेपाली नागरिकसँग पनि सहयोगको अपेक्षा गर्दै उनले सबैलाई एकजुट भएर शक्तिशाली संगठन निर्माण गर्न आह्वान गरे। ‘हामी यो देशमा केही गर्छौं, गर्न सक्छौं भनेर माटोमा खुट्टा जमाएर बसेका हौं,’ सभापति थापाले भने।
