चितवन :- चितवन क्षेत्र नम्बर ३ सम्बन्धी मत सर्वेक्षणको समाचार सार्वजनिक भएपछि निर्वाचन माहोल थप तातेको छ। अनलाइन सञ्चारमाध्यम सेतोपाटीले प्रकाशित गरेको सर्वेक्षण रिपोर्टपछि निर्वाचन आयोग, नेपालले औपचारिक रूपमा चासो देखाउँदै कारबाही प्रक्रिया अघि बढाएको छ।
आयोगले उक्त सामग्री निर्वाचन आचारसंहिता, २०८२ विपरीत देखिएको जनाउँदै प्रेस काउन्सिल नेपाललाई पत्राचार गरी आवश्यक निर्णय लिन अनुरोध गरेको जनाएको छ। आयोगका अनुसार उम्मेदवारको मनोनयन दर्तापछि मतदान सम्पन्न नभएसम्म मत सर्वेक्षण गर्न, नतिजा घोषणा गर्न वा त्यस्ता सामग्री प्रकाशन–प्रसारण गर्न नहुने स्पष्ट कानुनी व्यवस्था छ।
यस विषयमा उम्मेदवार रेनु दाहालले सामाजिक सञ्जालमार्फत असन्तुष्टि व्यक्त गरेकी छन्। उनले मत सर्वेक्षणका नाममा भ्रामक सामग्री प्रकाशन भएको उल्लेख गर्दै यस्ता गतिविधिले निर्वाचन प्रक्रियालाई प्रभावित पार्न सक्ने चेतावनी दिएकी छन्।
घरदैलो अभियानमा व्यस्त रहेको बताउँदै उनले मतदाताबाट प्राप्त विश्वास र समर्थनप्रति आभार व्यक्त गरेकी छन्। साथै निष्पक्ष, स्वच्छ र मर्यादित निर्वाचनका लागि सबै पक्ष जिम्मेवार बन्नुपर्नेमा जोड दिएकी छन्।
चितवन–३ मा मुख्य प्रतिस्पर्धीबीचको टक्करलाई राष्ट्रिय स्तरमै चासोका साथ हेरिएको छ। सर्वेक्षण विवादले चुनावी बहसलाई थप तीव्र बनाएको छ भने अन्तिम निर्णय भने मतदाताको मतबाट नै हुने स्पष्ट छ।
