बुटवल :- रुपन्देही क्षेत्र नं. २ मा प्रतिनिधिसभा निर्वाचन नजिकिँदै गर्दा चुन्नप्रसाद शर्मा चुनावी मैदानमा सक्रिय देखिएका छन्। युवालाई विदेशभन्दा स्वदेशमै सम्भावना खोज्न प्रेरित गर्ने एजेन्डासहित उनी मतदातामाझ पुगिरहेका छन्।
२०४० सालमा उमादेवी शर्मासँग वैवाहिक जीवनमा बाँधिएका शर्मा हाल बुटवल उपमहानगरपालिका–११ का स्थायी बासिन्दा हुन्।गिता ,प्रकाश,प्रशन्न र प्रतिमा उनका सन्तान हुन्। परिवारको एकता, मेलमिलाप र सहकार्य नै सार्वजनिक जिम्मेवारी वहन गर्ने आधार भएको उनको भनाइ छ।
शिक्षण, उद्योग, समाजसेवा र सार्वजनिक जीवनमा सक्रिय रहँदै आएका शर्मा साधारण पृष्ठभूमिबाट अघि बढेका व्यक्तित्वका रूपमा चिनिन्छन्। इमानदारी, परिश्रम र स्पष्ट दृष्टिकोणले नै आफूलाई यहाँसम्म ल्याएको उनी निकटवर्तीहरू बताउँछन्।
नेपाली काँग्रेसका महासमिति सदस्यसमेत रहेका शर्मा यसपटक काँग्रेसबाट रुपन्देही–२ का उम्मेदवार हुन्। उनी भन्छन्, “राजनीति आस्थाको विषय हुन सक्छ, तर सामाजिक र व्यवसायिक जीवनमा मैले कहिल्यै विभेद गरेको छैन। सबैको साथ र सहयोग पाउने विश्वास छ।”
स्थानीय तहमा उनको मिलनसार र सरल स्वभावका कारण विभिन्न राजनीतिक आस्था राख्ने मतदाताबाट समेत सकारात्मक प्रतिक्रिया पाइरहेको बताइन्छ। चुनावी प्रतिस्पर्धा चर्किंदै जाँदा रुपन्देही–२ मा उनको उपस्थितिलाई अर्थपूर्ण रूपमा हेरिएको छ।
