बुटवल :- नवलपरासी पश्चिम जिल्ला प्रशासन कार्यालयले राष्ट्रिय स्वतन्त्र पार्टी (रास्वपा) का सभापति रवि लामिछाने सहभागी हुने भनिएको कार्यक्रमप्रति सचेत गराएको छ। निर्वाचन आचारसंहिता विपरीत गतिविधि हुन सक्ने भन्दै प्रशासनले सावधानी अपनाउन आग्रह गरेको हो।
जिल्ला दौडाहमा रहेका लामिछाने मंगलबार नवलपरासी पश्चिमका विभिन्न स्थानमा आयोजना गरिएका कार्यक्रममा सहभागी हुने समय तय भएको जानकारी प्रशासनले पाएको जनाएको छ। प्रशासनका अनुसार मंगलबार बिहान ८ बजेदेखि दिउँसो १ बजेसम्म नवलपरासी पश्चिमको निर्वाचन क्षेत्र नम्बर १ र २ मा कार्यक्रम आयोजना हुने सूचना प्राप्त भएको थियो।
तर ती कार्यक्रम निर्वाचन आचारसंहिता, २०८२ विपरीत पर्न सक्ने भन्दै जिल्ला प्रशासन कार्यालयले आचारसंहिताविपरीत हुने कुनै पनि गतिविधि नगर्न र नगराउन सम्बन्धित सबैलाई सचेत गराएको छ।
प्रशासनद्वारा जारी सूचनामा भनिएको छ,“प्रतिनिधि सभा सदस्यको आसन्न निर्वाचनलाई स्वतन्त्र, निष्पक्ष, स्वच्छ, पारदर्शी, मितव्ययी तथा भयमुक्त वातावरणमा सम्पन्न गर्न निर्वाचन आयोगद्वारा निर्वाचन आचारसंहिता, २०८२ लागू भई परिपालना सम्बन्धमा मिति २०८२ साल माघ १४ गते सूचना जारी भइसकेको छ।”
सूचनामा थप उल्लेख गरिएको छ कि मिति २०८२ साल माघ २७ गते यस जिल्लामा ‘राष्ट्रिय स्वतन्त्र पार्टीका सभापति रवि लामिछानेको जनसम्पर्क तथा घण्टी अभिवादन कार्यक्रम’ रहेको जानकारी प्राप्त भएकाले सो कार्यक्रम सञ्चालन गर्दा निर्वाचन आचारसंहिता आकर्षित हुने गरी कुनै पनि गतिविधि नगर्न नगराउन सम्बन्धित सबैलाई जानकारी गराइएको हो।
प्रशासनको चेतावनीपछि लामिछानेको कार्यक्रम कसरी अघि बढ्छ भन्नेबारे राजनीतिक वृत्तमा चासो बढेको छ।
