बुटवल :-बुटवल उपमहानगरपालिकाले आफ्नो ६७औँ स्थापना दिवसको अवसर पारेर बृहत् सरसफाइ अभियान सुरु गरेको छ। सप्ताहव्यापी कार्यक्रमअन्तर्गत नगर प्रमुख खेलराज पाण्डेय र उपप्रमुख सावित्रादेवी अर्याल स्वयं झाडु बोकेर सरसफाइमा सहभागी भएका छन्।
अभियानको दोस्रो दिन सोमबार योगीकुटीदेखि कालिका मानवज्ञान माध्यमिक विद्यालय क्षेत्रसम्म सडक सरसफाइ गरिएको हो। बिहानैदेखि सुरु भएको कार्यक्रममा विद्यार्थी, टोल विकास संस्थाका प्रतिनिधि, उपमहानगरपालिकाका कर्मचारी तथा जनप्रतिनिधिको उल्लेख्य सहभागिता रहेको थियो।
सरसफाइ अभियानलाई औपचारिकतामा मात्र सीमित नगरी निरन्तरता दिनुपर्नेमा जोड दिँदै नगर प्रमुख पाण्डेयले सफा र स्वच्छ शहर निर्माण सबैको साझा जिम्मेवारी भएको बताउनुभयो। “सफा बुटवल बनाउन उपमहानगरपालिका मात्र होइन, प्रत्येक नागरिकको सक्रिय सहभागिता आवश्यक छ,” उहाँले भन्नुभयो।
उपप्रमुख अर्यालले बुटवललाई स्वच्छ, हरियाली र व्यवस्थित शहरका रूपमा विकास गर्ने उपमहानगरपालिकाको लक्ष्य रहेको उल्लेख गर्नुभयो। नियमित सरसफाइ अभियानमार्फत स्वस्थ र आकर्षक शहर निर्माणका लागि सबै पक्षको सहकार्य अपरिहार्य रहेको उहाँको भनाइ थियो।
सरसफाइ कार्यक्रममा कालिका मानवज्ञान माध्यमिक विद्यालयका विद्यार्थी, विभिन्न टोल विकास संस्थाका प्रतिनिधि तथा उपमहानगरपालिकाका कर्मचारीहरू सहभागी भएका थिए।
यसअघि आइतबार नयाँ बसपार्क क्षेत्रबाट सुरु गरिएको अभियानमा सिद्धार्थ गौतम बुद्ध क्याम्पसका विद्यार्थीहरूको सहभागिता रहेको थियो।
उपमहानगरपालिकाले माघ २५ गतेदेखि फागुन २ गतेसम्म बुटवलका विभिन्न स्थानमा सरसफाइ अभियान सञ्चालन गर्ने जनाएको छ।
