बुटवल :- मारवाडी महिला मञ्च रुपन्देहीले बुटवल उपमहानगरपालिका–मैनाबगर मजुवा स्थित श्री सुर्योदय आधारभूत विद्यालयलाई शैक्षिक तथा खाद्यान्न सामग्री सहयोग गरेको छ।
मञ्चकी अध्यक्ष रुपम महेस्वरी, अभिभावक रेखा मालपानी तथा मञ्चका विभिन्न पदाधिकारीहरूको उपस्थितिमा विद्यालयलाई १६५ वटा थाल तथा विभिन्न खाद्यान्न सामग्री सहयोग गरिएको हो। विद्यार्थीहरूलाई खाजा खान सहज होस् भन्ने उद्देश्यले उक्त सामग्री प्रदान गरिएको मञ्चले जनाएको छ।
यसै अवसरमा अभिभावक रेखा मालपानीले विद्यार्थीहरूलाई चिसो तथा तातो पानी सहज रूपमा पिउन सकून् भन्ने उद्देश्यले वाटर डिस्पेन्सर सहयोग गर्नुभएको थियो। त्यस्तै, विद्यालयमा बेलाबेलामा विद्यार्थीहरूका लागि सेलरोटी पकाएर खुवाउन सहज होस् भन्ने अभिप्रायले सरस्वती बश्यालले एकै पटक छ वटा सेलरोटी पकाउन मिल्ने ठूलो कराही सहयोग गर्नुभएको थियो।
कार्यक्रम विद्यालयका प्रधानाध्यापक शोभा ज्ञवालीको अध्यक्षतामा सम्पन्न भएको थियो। कार्यक्रममा विद्यालय शिक्षक–अभिभावक संघका अध्यक्ष तारा प्रसाद, मञ्चकी अध्यक्ष रुपम महेस्वरी, अभिभावक रेखा मालपानी लगायतले सहयोग हस्तान्तरण गर्दै यस्ता सामाजिक कार्यले विद्यार्थीको पठनपाठनमा सकारात्मक प्रभाव पर्ने धारणा व्यक्त गर्नुभएको थियो।
कार्यक्रमको अन्त्यमा प्रधानाध्यापक शोभा ज्ञवालीले विद्यालयप्रति देखाइएको सहयोग र सद्भावप्रति आभार व्यक्त गर्दै धन्यवाद ज्ञापन गर्नुभएको थियो भने कार्यक्रमको सञ्चालन सरस्वती बश्यालले गर्नुभएको थियो।
मारवाडी महिला मञ्च रुपन्देहीले यसअघि पनि शिक्षा, स्वास्थ्य तथा सामाजिक सेवाका क्षेत्रमा निरन्तर योगदान गर्दै आएको छ।
