बुटवल :- गुल्मी चारपाला रूपन्देही सम्पर्क समाजको अध्यक्षमा हिराधर अर्याल निर्वाचित हुनुभएको छ। समाजको बुटवलमा सम्पन्न सातौँ साधारण सभा तथा तेस्रो अधिवेशनले अर्यालको नेतृत्वमा नयाँ कार्यसमिति चयन गरेको हो।
नवनिर्वाचित कार्यसमितिअनुसार समाजको उपाध्यक्षमा नर प्रसाद श्रेष्ठ, सचिवमा विकास टण्डन, सह–सचिवमा सबिना टण्डन तथा कोषाध्यक्षमा काजीमान टण्डन चयन हुनुभएको छ।
त्यसैगरी सदस्यहरूमा रमेश कार्की, गंगा ज्ञवाली, हरि कुमार श्रेष्ठ, रविकिरण खत्री, राजेश थापा, हुम बहादुर श्रेष्ठ, अमर सिंह बस्नेत र विश्व थापा रहनुभएको छ।
यसअघि सम्पन्न साधारण सभा लुम्बिनी प्रदेश सभा सदस्य धनेन्द्र कार्कीको प्रमुख आतिथ्यतामा सम्पन्न भएको थियो। सो अवसरमा बोल्दै प्रदेश सांसद कार्कीले सहकार्य र एकताबाट मात्रै सामाजिक कार्यलाई प्रभावकारी रूपमा अगाडि बढाउन सकिने बताउनुभयो। समाजले हालसम्म गरेका कार्यको प्रशंसा गर्दै उहाँले आफ्नो तर्फबाट सधैँ सकारात्मक सहयोग रहने प्रतिबद्धता व्यक्त गर्नुभयो।
कार्यक्रममा गुल्मी दरबार गाउँपालिकाका अध्यक्ष सरोज कुमार थापा, समाजका सल्लाहकार हेमलाल शर्मा भुसाल, हुमनाथ ज्ञवाली लगायतले शुभकामना मन्तव्य व्यक्त गर्नुभएको थियो।
अधिवेशनको निर्वाचन मण्डलमा संयोजकमा पूर्व अध्यक्ष हुमनाथ ज्ञवाली तथा सदस्यहरूमा हेमलाल शर्मा भुसाल र गोविन्द अर्याल रहनुभएको थियो।
यस्तै, नव निर्वाचित अध्यक्ष हिराधर अर्यालले समाजले हालसम्म सञ्चालन गर्दै आएका गतिविधिलाई निरन्तरता दिँदै थप नयाँ तथा प्रभावकारी कार्यक्रमहरू अघि ल्याउने प्रतिबद्धता व्यक्त गर्नुभएको थियो।
