बुटवल:- नेकपा एमालेका नेता तथा पूर्व प्रतिनिधिसभा सदस्य वासुदेव घिमिरे राष्ट्रिय स्वतन्त्र पार्टी (रास्वपा) प्रवेश गर्ने तयारीमा रहेका छन्। रुपन्देही–२ बाट प्रतिनिधिसभा सदस्यमा उम्मेदवारी दिने प्रस्ताव आएको र त्यसप्रति आफू सकारात्मक रहेको घिमिरेले बताएका छन्।
देउराली दर्शन मिडियासँग कुरा गर्दै घिमिरेले भने, “राष्ट्रका लागि तपाईंको आवश्यकता छ, हाम्रो टिममा आउनुहोस् र सँगै अघि बढौं भन्ने प्रस्ताव आएको छ। म अहिले पनि एमालेकै संगठित सदस्य हुँ। अन्तिम टुंगो लाग्न बाँकी छ, तर प्रस्तावप्रति सकारात्मक छु।”
उनले मुलुक परिवर्तनको दिशामा अघि बढ्न खोजिरहेको अवस्थामा आएको प्रस्तावलाई सकारात्मक रूपमा लिएको बताए। तर केही विषयमा छलफल टुंगिन बाँकी रहेकाले हालसम्म रास्वपा प्रवेशको औपचारिक निर्णय भने भइनसकेको स्पष्ट पारे।
रुपन्देही–२ बाट नै निर्वाचन लड्ने गरी रास्वपा प्रवेश गर्न लागेको भन्ने चर्चाबारे सोधिएको प्रश्नमा घिमिरेले भने, “यही क्षेत्रबाट चुनाव लड्ने भन्ने कुरा टुंगिएको छैन। सबै विषय टुंगिएपछि मुलुकको आवश्यकताअनुसार निर्णय लिइन्छ।”
घिमिरे काठमाडौँ महानगरपालिकाका मेयर बालेन शाहको टिममार्फत रास्वपा प्रवेश गर्न लागेको चर्चा छ। बालेन शाहले घिमिरेलाई उदाहरणीय कार्यसम्पादन गर्ने नेताका रूपमा पटक–पटक प्रशंसा गर्दै आएका छन्।
तिलोत्तमा नगरपालिकाका पूर्व नगर प्रमुख समेत रहेका घिमिरे २०७९ सालको प्रतिनिधिसभा निर्वाचनमा रुपन्देही–५ बाट निर्वाचित भएका थिए।
