अर्घाखाँची :- सन्धिखर्क नगरपालिका वडा नं. ७ का वडा अध्यक्ष चुरा बहादुर केसीले सुपादेउराली क्षेत्रको ऐतिहासिक, धार्मिक तथा सांस्कृतिक पहिचानमा आँच पुग्ने गरी गरिएका विभिन्न गतिविधिमा आफ्नो कुनै संलग्नता नरहेको स्पष्ट पार्नुभएको छ।
वडा अध्यक्ष केसीले केही समयदेखि सुपादेउरालीको महत्व र पहिचानलाई असर पर्ने खालका गतिविधि भएको विषयमा सार्वजनिक रूपमा विभिन्न चर्चा र टिकाटिप्पणी भइरहेको सन्दर्भमा आफू त्यसमा संलग्न नभएको बताउनुभयो। उहाँले सुपादेउराली क्षेत्र ऐतिहासिक तथा धार्मिक दृष्टिले अत्यन्त महत्वपूर्ण भएकाले यसको संरक्षण, सम्वर्द्धन र पहिचान जोगाउन आफू सधैं प्रतिबद्ध रहेको स्पष्ट गर्नुभयो।
उहाँका अनुसार सुपादेउरालीको मौलिकता र ऐतिहासिक गरिमामा नकारात्मक प्रभाव पार्ने कुनै पनि कार्य स्वीकार्य नहुने भन्दै यस्ता गतिविधि रोक्न सम्बन्धित निकायले गम्भीर ध्यान दिनुपर्ने आवश्यकता औंल्याउनुभयो।
वडा अध्यक्ष केसीले स्थानीय जनप्रतिनिधि, सरोकारवाला निकाय तथा स्थानीय बासिन्दासँग समन्वय गरेर सुपादेउरालीको संरक्षण र प्रवर्द्धनका लागि आगामी दिनमा थप पहल गरिने पनि जानकारी दिनुभयो।
