बुटवल :- कालिका मानवज्ञान माध्यमिक विद्यालयको ६५औँ वार्षिक उत्सव तथा स्थापना दिवसको अवसरमा आयोजित जिल्ला स्तरीय कालिका कप अन्तर्गत पहिलो दिन छात्र–छात्रा भलिबल प्रतियोगिता सुरु भएको छ।
पहिलो दिन छात्र भलिबलतर्फ ६ वटा खेल सम्पन्न भएका छन्। उद्घाटन खेलमा उजिरसिंह मावि र त्रिभुवन एकेडेमीबीच प्रतिस्पर्धा भएकोमा उजिरसिंह मावि विजयी हुँदै अघिल्लो चरणमा प्रवेश गरेको छ। दोस्रो खेलमा ज्ञनोदय मावि र सैनामैना माविबीच भएको खेलमा सैनामैना मावि विजयी भएको छ।
तेस्रो खेल इन्टेलेक्चुअल एकेडेमी र दीप बोर्डिङ स्कुलबीच भएकोमा दीप बोर्डिङ विजयी भएको हो। यस्तै सेन्ट जोसेफ मावि र शान्ति नमुना माविबीच भएको खेलमा सेन्ट जोसेफ मावि विजयी हुँदै अघिल्लो चरणमा प्रवेश गरेको छ। क्यानन मावि र कान्ती माविबीचको खेलमा कान्ती मावि विजयी भएको छ। ईडन बोर्डिङ र नवीन औद्योगिक माविबीच भएको खेलमा नवीन मावि विजयी हुँदै अघिल्लो चरणमा प्रवेश गरेको कालिका कप आयोजक समिति सदस्य शिक्षक हिरामान प्रधानले जानकारी दिए।
छात्रा भलिबलतर्फ ४ वटा खेल सम्पन्न भएका छन्। पहिलो खेलमा मणिमुकुन्द मावि र दीप बोर्डिङ माविबीच भएको खेलमा दीप बोर्डिङ मावि विजयी भएको छ। शान्ति नमुना मावि र देवदह बुद्ध पब्लिक माविबीचको खेलमा देवदह बुद्ध पब्लिक मावि विजयी हुँदै अघिल्लो चरणमा प्रवेश गरेको हो।
तेस्रो खेलमा सैनामैना मावि र कान्ती माविबीच प्रतिस्पर्धा भएकोमा कान्ती मावि विजयी भएको छ। मंगलबार सम्पन्न अन्तिम खेलमा अक्सफोर्ड मावि बुटवल र सिता माविबीच भएको खेलमा सिता मावि विजयी हुँदै अघिल्लो चरणमा प्रवेश गरेको हो।
कालिका कप अन्तर्गत आयोजित जिल्ला स्तरीय कबड्डी प्रतियोगितामा छात्रतर्फ ४ र छात्रातर्फ ४ खेल सम्पन्न भएका छन्। छात्र कबड्डीतर्फ पहिलो खेलमा नयाँ गाउँ मावि र कान्ती माविबीच भएको खेलमा कान्ती मावि विजयी भएको छ। मणिमुकुन्द मावि र क्याननबीच भएको खेलमा मणिमुकुन्द मावि विजयी भएको हो।
यस्तै कालिका मानवज्ञान मावि र बुद्ध दीप स्कुलबीच भएको खेलमा कालिका मानवज्ञान मावि विजयी हुँदै अघिल्लो चरणमा प्रवेश गरेको छ भने पशुपति मावि र त्रिभुवन एकेडेमीबीच भएको खेलमा त्रिभुवन एकेडेमी विजयी भएको छ।
विद्यालयका खेलकुद संयोजक ओमबहादुर सारुका अनुसार छात्रा कबड्डीतर्फ होराइजन जिविएस र अक्सफोर्डबीच भएको खेलमा अक्सफोर्ड विजयी भएको छ। इन्टेलेक्चुअल मावि र ईडन बोर्डिङबीच भएको खेलमा ईडन बोर्डिङ विजयी भएको हो। कान्ती मावि र दीप केबीच भएको खेलमा कान्ती मावि विजयी भएको छ भने होराइजन बोर्डिङ र त्रिभुवन एकेडेमीबीचको खेलमा होराइजन बोर्डिङ विजयी हुँदै अघिल्लो चरणमा प्रवेश गरेको खेलकुद समिति सदस्य शिक्षक हिरामान प्रधानले जानकारी दिए।
प्रतियोगिताको शुभारम्भ विद्यालयका पूर्व प्रधानाध्यापक तथा प्रमुख सल्लाहकार बुटवल कालिका क्याम्पसका क्याम्पस प्रमुख घनश्याम पाठक र विद्यालयका प्रधानाध्यापक दिनेश थापाले रेफ्रीलाई खेलकुद सामग्री प्रदान गरी गर्नुभएको इभेन्ट संयोजक हरिस ओलीले जानकारी दिए।
