बुटवल । सरकारी कार्यालयको सेवा प्रवाहलाई छिटोछरितो, सहज र प्रविधिमैत्री बनाउने चर्चा भइरहेका बेला बुटवलस्थित मालपोत कार्यालयको कार्यशैलीप्रति एक युवा व्यवसायीले असन्तुष्टि जनाएका छन्। बुटवलका युवा व्यवसायी प्रकाश भुसालले जग्गा पास गराउन मालपोत कार्यालय पुग्दा अनलाइन विवरण प्रविष्टि (इन्ट्री) गराउन मात्रै दिनभर धाउनुपरेको भन्दै कार्यालयको सेवा प्रवाहमाथि प्रश्न उठाएका हुन्।
सामाजिक सञ्जाल फेसबुकमार्फत आफ्नो अनुभव सार्वजनिक गर्दै भुसालले आवश्यक कागजात साथमा हुँदाहुँदै पनि अनावश्यक रूपमा विभिन्न फाँट र कार्यालय धाउन बाध्य बनाइएको गुनासो गरेका छन्।
उनका अनुसार ६ धुर जग्गा पास गराउने उद्देश्यले मालपोत कार्यालय पुगेपछि लेखनदासमार्फत प्रक्रिया सुरु भएको थियो। कार्यालयको सेवा सुधार भएको हुन सक्ने अपेक्षासहित आफैँ फाइल बोकेर प्रक्रिया अघि बढाएका उनी पुरानो जग्गाको विवरण अनलाइन प्रणालीमा प्रविष्ट गर्नुपर्ने भएपछि कोठा नम्बर ६ पुगेका थिए।
भुसालले आफ्नो साथमा लालपुर्जा, नागरिकता र जग्गाको स्पष्ट स्रेस्ता हुँदाहुँदै पनि उक्त फाँटका कर्मचारी हार्दिक श्रेष्ठले नापी कार्यालयबाट फिल्डबुक र प्लट रजिस्टरको प्रतिलिपि ल्याउन भनेको उल्लेख गरेका छन्।
आवश्यक विवरण सबै स्पष्ट देखिएको अवस्थामा थप कागजात किन चाहियो भन्ने प्रश्न गर्दा पनि कर्मचारीले नापी कार्यालय जानुपर्ने अडान लिएको उनको भनाइ छ।
‘नागरिकता छ, लालपुर्जा छ, स्रेस्ता पनि स्पष्ट छ। अनलाइन इन्ट्री गर्नकै लागि फेरि नापी कार्यालयबाट फिल्डबुक र प्लट रजिस्टर किन चाहियो ?’ भुसालले प्रश्न गरेका छन्।
उनले नापी कार्यालय पुगेपछि त्यहाँका कर्मचारीसँग थप कागजातको आवश्यकता बुझ्दा स्रेस्तामा कित्ता नम्बर अस्पष्ट भएको, कागजात च्यातिएको वा विवरण बुझ्न नसकिने अवस्थामा मात्रै त्यस्ता कागजात आवश्यक पर्ने जानकारी पाएको दाबी गरेका छन्।
भुसालका अनुसार उनको जग्गाको विवरण स्पष्ट रहेकाले थप कागजात आवश्यक नपर्ने जानकारी नापी कार्यालयबाट प्राप्त भएको थियो।
त्यसपछि पुनः मालपोत कार्यालय फर्किएका भुसालले नापीबाट ल्याएका कागजात कर्मचारीले नहेरी पहिल्यै उपलब्ध लालपुर्जा र स्रेस्ताकै आधारमा अनलाइन विवरण प्रविष्ट गरिदिएको बताएका छन्।
यही घटनाले आफूलाई अनावश्यक रूपमा नापी कार्यालय धाउन लगाइएको आशंका उत्पन्न भएको उनको भनाइ छ।
अनलाइन विवरण प्रविष्ट भएपछि कोठा नम्बर १३ पुग्दा कर्मचारी नभेटिएको र करिब १५ मिनेट कुर्नुपरेको उनले उल्लेख गरेका छन्। त्यसपछि कोठा नम्बर ९ पुगेपछि मात्रै अनलाइन इन्ट्रीको काम सम्पन्न भएको र कार्यालयबाट निस्कँदा अपराह्न ४ बजिसकेको उनको गुनासो छ।
‘एक दिनमा जग्गा पास हुने त कुरै भएन, अनलाइन इन्ट्री गर्न मात्रै एक दिन लाग्यो। के यही हो मालपोतको सुधार ?’ उनले फेसबुकमा प्रश्न गरेका छन्।
भुसालले एउटा सामान्य कामका लागि विभिन्न कोठा र फाँटमा गरी झन्डै २० पटक धाउनुपरेको अनुभव सुनाएका छन्। उनले ६ धुर जग्गाको लिखत पारित गर्ने प्रक्रिया एकै दिनमा सम्पन्न गर्न नसकिनुको कारणबारे समेत प्रश्न उठाएका छन्।
सेवाग्राहीसँग आवश्यक कागजात हुँदाहुँदै थप कागजात माग्ने, एउटा कामका लागि पटक–पटक विभिन्न फाँटमा पठाउने र समयमै सेवा उपलब्ध नगराउने प्रवृत्तिले सर्वसाधारणलाई सास्ती हुने उनको भनाइ छ।
‘आखिर यति झन्झटिलो किन बनाइन्छ ? अनावश्यक कागज किन खोजिन्छ ?’ भन्दै उनले मालपोत कार्यालयमा भएको भनिएको सुधार व्यवहारमा देखिनुपर्ने बताएका छन्।
भुसालको अनुभवले सरकारी कार्यालयमा डिजिटल प्रणाली लागू भए पनि त्यससँग जोडिएका प्रशासनिक प्रक्रिया सहज बनाउने विषयमा थप ध्यान दिनुपर्ने प्रश्न उठाएको छ।
यद्यपि, भुसालले लगाएका आरोप तथा थप कागजात माग्नुको कारणबारे सम्बन्धित मालपोत कार्यालय र उल्लेखित कर्मचारीको आधिकारिक प्रतिक्रिया प्राप्त भएको छैन। कागजात माग्नु प्रचलित प्रक्रियाअनुसार आवश्यक थियो वा थिएन भन्ने विषय सम्बन्धित कार्यालयबाट स्पष्ट हुन बाँकी छ।
स्रोत : बुटवलका युवा व्यवसायी प्रकाश भुसालको फेसबुक पोस्टमा आधारित।
