काठमाडौं :-बुढानिलकण्ठ नगरपालिका–६, हातिगौडास्थित भद्रकाली स्कुलले गुणस्तरीय शिक्षासँगै विद्यार्थीमा संस्कार, अनुशासन र नैतिक मूल्यको विकासलाई प्राथमिकतामा राख्दै विभिन्न कार्यक्रम सञ्चालन गरिरहेको जनाएको छ।
विद्यालयका सहायक प्रधानाध्यापक गणेश गिरीले आधुनिक र प्रविधिमैत्री शिक्षासँगै संस्कारयुक्त शिक्षा प्रदान गर्नु विद्यालयको मुख्य उद्देश्य रहेको बताउनुभयो। उहाँका अनुसार विद्यार्थीको सर्वाङ्गीण विकासलाई केन्द्रमा राखेर शैक्षिक तथा सहपाठ्य गतिविधिहरू सञ्चालन गरिँदै आएको छ।
हालै विद्यालयमा आयोजित शैक्षिक सुधार तथा सहकार्यसम्बन्धी छलफलमा शिक्षण–सिकाइलाई थप प्रभावकारी बनाउने, अनुशासन सुदृढ गर्ने तथा विद्यार्थी केन्द्रित शिक्षण प्रणालीलाई विस्तार गर्ने विषयमा विशेष जोड दिइएको थियो।
विद्यालयमा सम्पन्न गणेश पूजा लगायतका सांस्कृतिक कार्यक्रमले विद्यार्थीमा धार्मिक सहिष्णुता, आस्था र सामाजिक मूल्यको विकासमा सकारात्मक योगदान पुर्याएको सहायक प्रधानाध्यापक गिरीको भनाइ छ।
“विद्यालय केवल पढाइको केन्द्र मात्र नभई संस्कार, अनुशासन र जीवनोपयोगी शिक्षाको अभ्यास गर्ने थलो पनि हो,” उहाँले भन्नुभयो, “गुणस्तरीय शिक्षासँगै संस्कार विकासमा जोड दिनु आजको आवश्यकता हो।”
शिक्षक, अभिभावक तथा स्थानीय समुदायबीचको सहकार्यलाई थप सुदृढ बनाउँदै भद्रकाली स्कुललाई नमुना शैक्षिक संस्थाका रूपमा विकास गर्ने लक्ष्य लिइएको विद्यालय प्रशासनले जनाएको छ।
विद्यार्थीको क्षमता अभिवृद्धि, नेतृत्व विकास तथा नैतिक शिक्षालाई प्राथमिकतामा राखेर अघि बढाइएका कार्यक्रमले भद्रकाली स्कुललाई शिक्षा र संस्कृतिको समन्वय भएको उदाहरणीय शैक्षिक संस्थाका रूपमा स्थापित गर्दै लगेको छ।
