बुटवल :-बुटवलबाट गुल्मीतर्फ जाँदै गरेको मोटरसाइकल सिद्धबाबा नजिक दुर्घटना हुँदा गुल्मीका एक जनाको मृत्यु भएको छ। मोटरसाइकल सडकबाट करिब ९० मिटर तल खसेर तिनाउ नदीमा पुगेको थियो।
आइतबार दिउँसो पाल्पाको तिनाउ गाउँपालिका–३ स्थित तल्लो सिद्धबाबा नजिक लु.७४ प ९१७१ नम्बरको मोटरसाइकल अनियन्त्रित भई सडकबाट भिरतर्फ खसेको प्रहरीले जनाएको छ।
दुर्घटनामा गुल्मीको छत्रकोट गाउँपालिका–३ का ४७ वर्षीय नवराज पन्थ गम्भीर घाइते भएका थिए। दुर्घटनापछि उद्धार गरी उनलाई उपचारका लागि बुटवलस्थित लुम्बिनी प्रादेशिक अस्पताल ल्याइएको थियो।
अस्पतालमा उपचार भइरहेको अवस्थामा पन्थको मृत्यु भएको जिल्ला प्रहरी कार्यालय पाल्पाले जनाएको छ।
जिल्ला प्रहरी कार्यालय पाल्पाका डीएसपी भीमलाल भट्टराईका अनुसार मोटरसाइकल सडकबाट करिब ९० मिटर तल खसेर तिनाउ नदीसम्म पुगेको थियो।
सिद्धार्थ राजमार्गअन्तर्गतको सिद्धबाबा क्षेत्र पहाडी तथा घुमाउरो सडक खण्ड भएकाले यहाँ यात्रा गर्दा विशेष सावधानी आवश्यक हुन्छ।
दुर्घटना कसरी भयो भन्ने यकिन कारण खुलिसकेको छैन। घटनाबारे थप अनुसन्धान भइरहेको जिल्ला प्रहरी कार्यालय पाल्पाले जनाएको छ।
