गुल्मी :-गुल्मी–३ को हाहाडे गाउँ, पहाडका काखमा बसेको शान्त बस्ती। बिहानको घामसँगै खेतबारीमा व्यस्त किसान, विद्यालयतर्फ हतारिँदै गरेका विद्यार्थी र दैनिक काममा जुटेका स्थानीयहरू—यिनै दृश्यबीच एक दिन “सुनदै–सुनाउँदै” अभियान लिएर पुगे गोकर्ण बिष्ट।
कार्यक्रम औपचारिक भाषणभन्दा फरक थियो। यहाँ मञ्चभन्दा बढी महत्त्व थियो जनताको आवाजलाई। स्थानीय आमा–बुबा, युवा र ज्येष्ठ नागरिकहरूले आफ्ना गुनासा खुलस्त राखे। कसैले विद्यालयमा शिक्षक दरबन्दी अभावको कुरा गरे, कसैले वर्षौंदेखि अधुरो रहेको खानेपानी योजनाबारे चिन्ता व्यक्त गरे। कच्ची सडकका कारण बिरामी अस्पताल लैजानै समस्या हुने अवस्था, वर्षायाममा अवरुद्ध यातायात, कमजोर सञ्चार सञ्जाल—यी सबै विषयहरू एकपछि अर्को गर्दै उठिरहे।
हाहाडेको विकासका सपना धेरै छन्, तर चुनौती पनि कम छैनन्।
यहाँका युवाहरू रोजगारीको खोजीमा बाहिरिन बाध्य छन्। शिक्षा सुधार र सीपमूलक तालिमको अभावले गाउँमै सम्भावना खोज्न कठिन भएको स्थानीयको भनाइ छ।“हामीलाई भाषण होइन, काम चाहिएको छ,” एक युवाले कार्यक्रममा स्पष्ट शब्दमा भने।
गोकर्ण बिष्टले जनताका कुरा धैर्यपूर्वक सुन्दै विकास निर्माणमा सहभागिता र पारदर्शिता आवश्यक रहेको बताए। उहाँले शिक्षा, खानेपानी, यातायात र सञ्चारलाई प्राथमिकतामा राखेर योजनाबद्ध ढंगले काम अघि बढाउने प्रतिबद्धता व्यक्त गरे। “जनताको सुझाव नै हाम्रो मार्गदर्शन हो,” उहाँको भनाइ थियो।
हाहाडेमा भएको यो संवाद केवल एक कार्यक्रम मात्र थिएन, बरु विकासप्रतिको अपेक्षा र भरोसाको प्रतिविम्ब थियो। गाउँका वृद्धहरूको आँखामा अनुभवको गहिराइ थियो भने युवाको स्वरमा परिवर्तनको आकांक्षा।
महिलाहरूले स्वास्थ्य सेवा र स्वरोजगारका अवसरबारे उठाएका सवालहरूले स्थानीय विकासको अर्को आयाम उजागर गर्यो।
गुल्मी–३ को हाहाडेले विकासको नयाँ अध्याय सुरु गर्ने आशासहित, “सुनदै–सुनाउँदै” अभियानले जनताको मन छोएको देखिन्छ। अब हेर्न बाँकी छ—यी प्रतिबद्धताहरू व्यवहारमा कत्तिको उतारिन्छन्।
