काठमाडौं: प्रतिनिधिसभा सदस्य निर्वाचनका लागि आजदेखि औपचारिक प्रचार–प्रसार सुरु भएको छ। निर्वाचन आयोगका अनुसार प्रचार–प्रसार फागुन १८ गते राति १२ बजेसम्म गर्न पाइनेछ।
यस अवधिमा राजनीतिक दल र उम्मेदवारहरूले जुलुस, आमसभा, कोणसभा आयोजना गर्न र सञ्चारमाध्यममा निर्वाचनसम्बन्धी सामग्री प्रकाशन गर्न सक्नेछन्।
कार्यवाहक प्रमुख निर्वाचन आयुक्त रामप्रसाद भण्डारी का अनुसार आचारसंहिताको उल्लंघन हुने घटनामा शून्य सहनशीलता नीति अपनाइनेछ। उल्लंघन भएमा स्पष्टीकरण सोध्ने, सचेत गराउने, जरिवाना वा गम्भीर अवस्थामा उम्मेदवारी खारेज गर्नेसम्म कानूनी व्यवस्था छ।
आयोगले उम्मेदवारलाई पत्रपत्रिका, अनलाइन विज्ञापन, र आमसभा/कोणसभाको खर्च विवरण सम्बन्धित निर्वाचन कार्यालयमा पेश गर्न आवश्यक भएको स्पष्ट पारेको छ। साथै सामाजिक सञ्जालमा मिथ्या सूचना, दुष्प्रचार वा द्वेषपूर्ण अभिव्यक्ति दिन नपाइने पनि आयोगले दोहोर्याएको छ।
