बुटवल :- बालबालिकामा देखिने अटिजमसम्बन्धी समस्याबारे प्रारम्भिक कक्षाका शिक्षक–शिक्षिका तथा अभिभावकलाई जानकारी गराउने उद्देश्यले बुटवलमा अभिमुखीकरण कार्यक्रम सम्पन्न भएको छ।
पहिलो पाइला नेपाल, बुटवल शाखाको आयोजनामा शनिबार (२०८२ माघ १७ गते) श्रवण हेयरिङ एण्ड चाइल्ड केयर सेन्टरको प्राङ्गणमा उक्त कार्यक्रम आयोजना गरिएको हो। कार्यक्रममा बुटवल तथा आसपास क्षेत्रका करिब ४० भन्दा बढी विद्यालयका प्रारम्भिक कक्षामा अध्यापन गराउने शिक्षक–शिक्षिकाको उल्लेखनीय सहभागिता रहेको थियो।
कार्यक्रमका प्रमुख अतिथि टीकाराम न्यौपाने रहनुभएको थियो भने संस्थाका सह–सचिव प्रकाश पोख्रेलले स्वागत मन्तव्य व्यक्त गर्नुभएको थियो। कार्यक्रमको अध्यक्षता संस्थाका कार्यबाहक अध्यक्ष गौरव खनालले गर्नुभएको थियो। कार्यक्रम संयोजक तथा सञ्चालनको जिम्मेवारी संस्थाका सचिव रुद्र खनालले सम्हाल्नुभएको थियो। 
कार्यक्रममा वरिष्ठ अडियोलोजिस्ट तथा स्पिच ल्याङ्ग्वेज प्याथोलोजिस्ट बिद्वान भुसाल, वरिष्ठ अप्टोमेट्रिस्ट सन्तोष क्षेत्री तथा फिजियोथेरापिस्ट रक्षा रेग्मीले सहजीकरण गर्नुभएको थियो।
विशेषज्ञहरूले अटिजम भएका बालबालिकामा देखिने प्रारम्भिक लक्षण, कक्षाकोठामा देखिने व्यवहार, पहिचानका उपाय तथा आवश्यक उपचार र सहयोगका विषयमा व्यवहारिक प्रस्तुतीकरण गर्नुभएको थियो।
श्रवण हेयरिङ एण्ड चाइल्ड केयर सेन्टर प्रा.लि.को सहकार्यमा सम्पन्न उक्त कार्यक्रममा सहभागी शिक्षक–शिक्षिकाहरूले यस्ता अभिमुखीकरण कार्यक्रमले प्रारम्भिक तहमा नै बालबालिकाको समस्या पहिचान गर्न सहज हुने प्रतिक्रिया दिएका थिए।
आयोजक संस्था पहिलो पाइला नेपाल, बुटवल शाखाले आगामी दिनमा पनि शिक्षा तथा बालबालिका केन्द्रित सचेतनामूलक कार्यक्रमलाई निरन्तरता दिने जनाएको छ।
