गुल्मी :-विश्व क्रिकेट इतिहासमा भारत र पाकिस्तानबिचको खेल सर्वाधिक चासोका बिच हेरिने खेल हो । विश्वकप क्रिकेटमा यिनै दुइ देश आज (शनिबार) आमने सामने हुँदैछन् ।
अहमदावाद स्थित नरेन्द्र मोदी स्टेडियममा क्रिकेटका हस्ती देशहरु भिड्दैछन् । बहुप्रतिक्षित भारत–पाकिस्तान खेल नेपाली समय अनुसार सवा २ बजे सुरु हुँदैछ । विश्वकप क्रिकेटको विगतलाइ हेर्दा अहिलेसम्म भारत र पाकिस्तान कुल ७ पटक आमने सामने भएका छन् जसमा सबै खेल भारतले आफ्नो पक्षमा पारेको छ ।
विश्वकपमा भारत र पाकिस्तान पहिलो पटक १९९२ मा अष्ट्रेलियामा भिडेका थिए । जसमा भारतले ४३ रनको जित हात पारेको थियो । १९९६ मा ३९ रन, १९९९ मा ४७ रन, २००३ मा ६ विकेट, २०११ मा २९, २०१५ मा ७६ र २०१९ मा ८९ रनले भारतले पाकिस्तानलाई पराजित गरेको छ । जारी विश्वकपमा भारत र पाकिस्तान दुबै देशले २—२ खेल खेलिसकेका छन र दुबैले शत प्रतिशत जित निकालेका छन् ।
हालसम्मको अँक तालिका अनुसार दुवै देशको ४—४ अंक रहेको छ भने नेट रन रेट भारतको १.५ र पाकिस्तानको ०.९२७ रहेको छ । भारत अंक तालिकाको तेश्रो र पाकिस्तान चौथो स्थानमा रहेका छन् । एकदिवसीय क्रिकेटको शीर्षस्थानमा भारत र दोश्रो स्थानमा पाकिस्तान रहेका छन् । यस्तै ब्याटिङ शीर्षस्थानमा पाकिस्तानका बाबर आजम रहेका छन् भने दोश्रोमा भारतका शुभमन गिल रहेका छन् ।
बलिङतर्फ भारतका मोहम्मद सिराज दोश्रो स्थानमा रहिरहँदा कुनै पनि पाकिस्तानी खेलाडी शीर्ष दशमा अटाउन सकेका छैनन् । समग्रमा भारत र पाकिस्तानविच अहिलेसम्म १ सय ३४ एकदिवसीय खेल सम्पन्न भएका छन । समग्र एक दिवसीय खेलमा भारतमाथि पाकिस्तान हावी भएको छ । पाकिस्तानले ७३ जित निकालेको छ भने भारतले ५६ खेल आफ्नो पक्षमा पारेको छ । ५ खेल अनिर्णित रहेका छन् ।
घरेलु मैदानमा भएका खेलमा भारतले धेरै खेलमा जित हात पारेको छ । भारतले १४ खेल आफ्नो पक्षमा पारिरहँदा पाकिस्तानले भने ११ खेल मात्रै जित्न सकेको छ । शनिबारको खेल भारतको आफ्नो गृह मैदानमा हुँदैछ । न्युट्रल भेन्यु अर्थात अन्य देशका मैदानमा भएका कुल ७४ खेल मध्ये पाकिस्तानले ४० र भारतले ३४ खेलमा जित निकालेका छन् ।
समग्र खेलमा भारत भन्दा पाकिस्तानले धेरै खेलमा सफलता हात पारे पनि विश्वकपको यात्रा भने पाकिस्तानको लागि निकै दुखद रहेको छ, उसले हालसम्म एक खेल पनि भारत विरुद्ध जित निकाल्न सकेको छैन । जारी विश्वकपमा लयमा रहेका भारतीय खेलाडीहरुमा रोहित शर्मा, के एल राहुल, विराट कोहली रहेका छन् । पाकिस्तानका रिजवान सर्वाधिक रन बनाउने खेलाडीको तेश्रो स्थानमा रहेका छन्, शीर्ष दशमा अहिलेसम्म भारतीय खेलाडी अटाउन सकेका छैनन् ।
यस्तै सर्वाधिक विकेट लिने खेलाडीहरुमा भारतका जसप्रित बुमराह र पाकिस्तानका हसन अलिले समान ६—६ विकेट लिँदै तेश्रो र चौथो स्थानमा रहेका छन् भने पाकिस्तानका ह्यारिस रउफ ५ विकेट लिँदै सातौँ स्थानमा रहेका छन् । भारतीय ओपनर शुभमन गिलको अनुपस्थितिले भारतीय टोली केही दवावमा रहेको छ । विश्व वरियतामा लामो समय शीर्षस्थानमा रहेका बाबर आजमको फितलो प्रदर्शनले पाकिस्तानी टोलीको पनि चिन्ता बढेको छ ।
