बिराटनगर :- सवारी जाँचमा खटिएका एक प्रहरी अधिकृत माथी एक युवाले धारिलो हतियार प्रहार गर्दा गम्भिर घाईते भएका छन्।
झापाको झिलझिलेमा रहेको इलाका प्रहरी कार्यालयका इन्चार्ज एवं प्रहरी निरीक्षक युवराज कटुवाललाई आज साँझ ७ बजेतिर एक युवाले धारिलो हतियार प्रहार गरेर घाइते बनाएका हुन्।
प्रहरी निरीक्षक कटुवाल आफ्ना सहयोगी प्रहरी जवान लिएर पूर्वपश्चिम राजमार्गस्थित झापाको झरना खोला नजिक नियमित सवारी जाँचमा खटिएका थिए।
तीन जना युवा सवार एउटा मोटरसाइकललाई रोकेर नियन्त्रणमा लिने क्रममा एक युवाले बञ्चरोले कटुवाललाई अचानक प्रहार गरेको जिल्ला प्रहरी कार्यालय झापाका प्रहरी उपरीक्षक दुर्गाराज रेग्मीले बताए।
उनका अनुसार घाइते प्रहरी निरीक्षक कटुवालको टाउको र हातमा गम्भीर चोट लागेको छ।
बिर्तामोडको बिएन्डसी अस्पतालमा उनको उपचार भइरहेको छ। प्रहरीले आक्रमणमा संलग्नसहित तीनै जना युवालाई नियन्त्रणमा लिएको छ।
आक्रमणमा संलग्न युवा मादकपदार्थ सेवन गरेर लठ्ठ भई मोटरसाइकलमा सवार रहेको प्रहरीको भनाइ छ।
