बुटवल :- प्रतिनिधि सभा सदस्य निर्वाचन आउन अब चार दिन मात्रै बाँकी रहँदा रुपन्देहीमा चुनावी गतिविधि तीव्र बनेका छन्। उम्मेदवारहरू मतदातासँग प्रत्यक्ष भेटघाट गर्दै गुनासा, सुझाव र समस्या सुन्ने कार्यमा सक्रिय देखिएका छन्।
यसैक्रममा रुपन्देही क्षेत्र नं. २ बाट नेपाली कांग्रेस का उम्मेदवार चुन्नप्रसाद शर्मा पौडेल तथा समानुपातिकतर्फकी उम्मेदवार रिता सेन ओली ले बुधबार पनि घरदैलो अभियानलाई निरन्तरता दिएका छन्।
बिहान करिब ७ बजेदेखि सुरु भएको अभियान बुटवल उपमहानगरपालिका–११ का विभिन्न बस्ती तथा टोलहरूमा केन्द्रित थियो। माथिल्लो मजुवा, मजुवा, सिरानगाउँ, धुर्वनगर, युद्धनगर, दुर्गानगर, न्यु दुर्गानगर, नहरपुर र बुद्धनगरलगायत क्षेत्रमा पुगेर उम्मेदवारहरूले मतदातासँग प्रत्यक्ष संवाद गरेका थिए।
सहकारी पीडितको न्यायका लागि प्रतिबद्धता
घरदैलोका क्रममा पत्रकारसँग कुरा गर्दै उम्मेदवार पौडेलले सहकारी पीडितहरूको पीडा, आक्रोश र निराशालाई आफूले गहिरो रूपमा अनुभूति गरेको बताए। सहकारीमा विश्वास गरेर बचत गरेका सर्वसाधारण केही गैरजिम्मेवार व्यक्तिका कारण अन्यायमा परेको उल्लेख गर्दै उनले यसलाई केवल आर्थिक क्षति मात्र नभई विश्वासमाथिको चोटका रूपमा व्याख्या गरे।
‘सहकारी पीडितको न्यायका लागि मेरो प्रतिबद्धता केवल चुनावी वाचा मात्र होइन, यो नैतिक दायित्व पनि हो। यदि तपाईंहरूले मलाई संसदमा प्रतिनिधित्व गर्ने अवसर दिनुभयो भने, पीडितको रकम फिर्ता गराउने कानुनी प्रक्रिया तीव्र बनाउने पहल गर्नेछु,’ उनले भने। दोषीलाई राजनीतिक संरक्षणबाट मुक्त गर्दै कानुनी कारबाही सुनिश्चित गर्न दबाब दिने र सहकारी क्षेत्रलाई पारदर्शी तथा उत्तरदायी बनाउन नीतिगत सुधारका लागि आवाज उठाउने उनको भनाइ छ।
पीडित परिवारका लागि अस्थायी राहत तथा पुनर्स्थापनाको व्यवस्था गर्न सम्बन्धित निकायसँग समन्वय गर्ने पनि उनले बताए। सहकारीलाई ठगीको माध्यम होइन, जनविश्वासको संस्थाका रूपमा पुनःस्थापित गर्नुपर्नेमा आफू अडिग रहेको उनको धारणा छ।
घरदैलोका क्रममा स्थानीयले सुकुम्बासी समस्या, लालपुर्जा वितरण, व्यवस्थित फोहोर व्यवस्थापन, डम्पिङ साइटको व्यवस्थापन, सडक कालोपत्रे तथा सुरक्षा जस्ता विषयमा उम्मेदवारहरूको ध्यानाकर्षण गराएका थिए। उम्मेदवारहरूले ती समस्यालाई प्राथमिकतामा राखेर समाधानतर्फ पहल गर्ने प्रतिबद्धता जनाएका छन्।
