बुटवल :- राष्ट्रिय स्वतन्त्र पार्टी (रास्वपा)का सभापति रवि लामिछाने चुनावी अभियानका क्रममा रुपन्देही आइपुगेका छन्। आइतबार साँझ रुपन्देही आएका लामिछाने मणिग्रामस्थित तारे होटल विश्राम बाटिकामा बसेका थिए।
सोमबार लामिछानेले रुपन्देहीका पाँचवटै निर्वाचन क्षेत्रमा पुगेर जनसम्पर्क गर्ने कार्यक्रम तय भएको छ। रास्वपा रुपन्देहीका सभापति डा. बुद्धिप्रसाद शर्माका अनुसार लामिछानेको जनसम्पर्क यात्रा देवदह नगरपालिका–खैरेनीबाट सुरु भई दिनभर पाँच निर्वाचन क्षेत्रका २६ स्थानमा पुग्नेछ। दिनको अन्त्यमा उनी क्षेत्र नं. ५ मा पर्ने बुद्ध जन्मस्थल लुम्बिनी र मायादेवी मन्दिरमा दर्शन गर्ने कार्यक्रम रहेको छ।
कार्यक्रमअनुसार बिहान ११ बजे क्षेत्र नं. ३ अन्तर्गत भैरहवा, दिउँसो १ बजे क्षेत्र नं. ४ को कोटहीमाई–मर्चवार, २ बजे क्षेत्र नं. ५ को पर्सहवा, सवा ३ बजे क्षेत्र नं. २ को मोतिपुर, त्यसपछि बुटवल–नयाँगाउँ–सालझण्डी हुँदै साँझ सवा ६ बजे लुम्बिनी पुग्ने कार्यतालिका तय गरिएको शर्माले जानकारी दिए।
एकै दिन धेरै स्थानमा पुग्नुपर्ने भएकाले सबै ठाउँमा औपचारिक सम्बोधन नहुने र केही चयनित स्थानमा मात्र छोटो सम्बोधन हुन सक्ने शर्माले बताए।
रुपन्देहीका पाँचै निर्वाचन क्षेत्रमा रास्वपाबाट उम्मेदवार रहेका छन्। क्षेत्र नं. १ मा महामन्त्री सुनिल लम्साल, २ मा सुलभ खरेल, ३ मा डा. लेखजंग थापा, ४ मा कन्हैया बनिया र ५ मा तौफिफ अहमद खान उम्मेदवार रहेका छन्।
रुपन्देहीका कार्यक्रम सम्पन्न गरेपछि सभापति लामिछाने सोमबार राति कपिलवस्तु जाने कार्यक्रम तय भएको रास्वपाले जनाएको छ।
