कास्की :- लामो समय नेकपा (एमाले) मा सक्रिय रहेर हालै मात्र नयाँ गठित नेपाली कम्युनिस्ट पार्टी मा प्रवेश गरेका नेता भीम रावल भाषणका क्रममा पुर्न: UML नै बोल्न पुग्दा आजको राजनीतिक वृत्तमा चर्चाको विषय बनेका छन्।
आइतबार पोखराको मानवअधिकार चोकमा आयोजित ‘नेपाली कम्युनिस्ट पार्टी’ को एकता सन्देशसभालाई सम्बोधन गर्ने क्रममा रावलले भुलवश पुरानै पार्टीको नाम उच्चारण गर्दै एमालेकै बहुमत आउने दाबी गरे। उनका शब्दहरूले सभास्थलमा उपस्थित सहभागीहरूलाई छक्क परेसँगै केही क्षण रमाइलो वातावरण पनि बनेको थियो।
सभामा रावलले भने,“मलाई पूर्ण विश्वास छ, आउने निर्वाचनमा नेकपा (एमाले) को बहुमतलाई, नेकपा (एमाले) को यात्रालाई कसैले रोक्न सक्ने छैन।”
उनले यति भनिसक्दा सहभागीहरूले ताली बजाएर प्रतिक्रिया दिएका थिए। तर केही सेकेन्डमै उनले आफ्नै त्रुटि बुझे र तत्कालै वक्तव्य सच्याउँदै भने,
“नेपाली कम्युनिस्ट पार्टीलाई कसैले रोक्न सक्ने, छेक्न सक्ने छैन।”
रावल हालै मात्र गत कात्तिक २६ गते एमालेबाट कारबाहीमा परेपछि लामो निष्क्रियता तोड्दै नयाँ गठित नेपाली कम्युनिस्ट पार्टी मा प्रवेश गरेका हुन्।
पोखराको चिप्लेढुंगामा वर्षौँपछि पुनः उपस्थित हुन पाएका कारण आफू उत्साहित भएको पनि उनले बताए। धनगढी र लमहीमा जस्तै पोखरामा पनि ठूलो जनसमूह देखेर आफू उत्साहित भएको उल्लेख गर्दै उनले आगामी दिवसमा पार्टीले समृद्ध नेपालको नेतृत्व गर्ने दाबी गरे।
रावलको उक्त ‘जिब्रो चिप्लिएको’ क्षणले राजनीतिक वृत्त तथा सामाजिक सञ्जालमा चर्को तर हल्का प्रकारको बहस उत्पन्न गरेको छ, धेरैले यसलाई UML मा बिताएको लामो अनुभवको ‘स्वाभाविक असर’ भन्दै टिप्पणी गरेका छन्।
