काठमाडौं :-बुढानिलकण्ठ–३ देउचोकका कृषक गिर बहादुर घर्तीले स्थापना गरेको स्वर्गद्वारी कृषि फार्म अहिले स्थानीय क्षेत्रमा आत्मनिर्भरताको उदाहरण बनेको छ। परिश्रम र लगनले स्वदेशमै कसरी सफलता हासिल गर्न सकिन्छ भन्ने प्रमाण बनेको छ यो फार्म।
केही वर्षअघि सानो जग्गाबाट सुरु गरिएको फार्ममा अहिले विभिन्न तरकारी, अन्नबाली र फलफूल उत्पादन हुँदै आएको छ। यसले एक स्थानीयलाई स्थायी रोजगारी पनि प्रदान गरेको छ, जसले गाउँमै रोजगारी सिर्जना गर्ने सम्भावना देखाएको छ।
फार्ममा उत्पादित वस्तुहरू रौथाने बजार, बुढानिलकण्ठमा बिक्री हुने गर्छन्। यसले स्थानीय बजारमा ताजा र गुणस्तरीय वस्तुहरू उपलब्ध गराउँदै आएको छ।
फार्मका सह–सञ्चालिका भुमा घर्ती मगर पनि यो सफलतामा बराबर सहभागी रहेकी छन्। उनले दैनिक रूपमा खेतबारी, पशुपालन र उत्पादन व्यवस्थापनमा सक्रिय भूमिका खेलेकी छन्। उनका अनुसार फार्मबाट मासिक करिब ३५ हजार रुपैयाँसम्म आम्दानी हुने गरेको छ।
भुमा घर्ती भन्छिन् — “परिश्रम गरे गाउँमै पनि राम्रो आम्दानी सम्भव हुन्छ। विदेशिनु मात्रै विकल्प होइन।”
गिर बहादुर घर्ती र भुमा घर्ती मगर दम्पतीको प्रयासले बुढानिलकण्ठ क्षेत्रमा कृषि व्यवसायलाई नयाँ दिशा दिएको छ। उनीहरूको सफलताले युवा पुस्तालाई कृषि पेशाप्रति आकर्षित गराउने आशा लिइएको छ।
