तम्घास :-नेपाली कांग्रेसको १५औँ महाधिवेशनअन्तर्गत ३५ वर्षमुनिको युवा खुलातर्फ ओमप्रसाद भण्डारी ‘अमृत’ले महाधिवेशन प्रतिनिधि पदमा उम्मेदवारी दिएका छन्। विद्यार्थी राजनीतिबाट पार्टी राजनीतिमा आएका भण्डारीले युवा सहभागिता, संगठन सुदृढीकरण र पुस्तान्तरणका मुद्दालाई आफ्नो उम्मेदवारीको प्रमुख आधार बनाएका छन्।
नेपाल विद्यार्थी संघबाट राजनीतिक यात्रा अघि बढाएका भण्डारीले नेविसंघ जिल्ला कार्यसमिति सदस्य तथा बुटवल बहुमुखी क्याम्पस नेविसंघ कार्यसमिति सदस्य र सचिवको जिम्मेवारी सम्हालिसकेको बताएका छन्।
पछिल्लो समय जेन–जी पुस्ताको राजनीतिक सहभागिताबारे बहस भइरहेका बेला भण्डारीले आफूलाई नयाँ पुस्ताको प्रतिनिधित्व गर्ने उम्मेदवारका रूपमा अघि सारेका छन्। पार्टीभित्र युवाको सहभागिता केवल उपस्थितिमा सीमित नभई नीति निर्माण, निर्णय प्रक्रिया र नेतृत्व तहसम्म पुग्नुपर्ने उनको धारणा छ।
भण्डारीका अनुसार उनले २०७४, २०७९ र २०८२ सालका निर्वाचनमा कांग्रेसका उम्मेदवारको चुनावी अभियानमा विभिन्न जिम्मेवारीमा रहेर काम गरेका थिए। विशेषगरी २०७९ सालको स्थानीय तह निर्वाचनमा युवा परिचालनको जिम्मेवारी सम्हालेर अभियानमा सक्रिय भएको उनले बताएका छन्।
विद्यार्थी संगठनदेखि पार्टीको चुनावी अभियानसम्म प्राप्त अनुभवलाई अब महाधिवेशन प्रतिनिधिको भूमिकासँग जोड्न चाहेको भण्डारीको भनाइ छ। उनले संगठनलाई थप सुदृढ, गतिशील र जनमुखी बनाउन नयाँ पुस्ताको ऊर्जा र अग्रजको अनुभवबीच समन्वय आवश्यक रहेको बताएका छन्।
‘अनुभवलाई जिम्मेवारीमा, युवाको ऊर्जालाई परिवर्तनमा र विचारलाई व्यवहारमा रूपान्तरण गर्ने’ संकल्पसहित आफू अघि बढेको भण्डारीले बताएका छन्।
उनले महाधिवेशन प्रतिनिधिका रूपमा युवाका मुद्दा र अपेक्षालाई पार्टीको नीति तथा निर्णय प्रक्रियासम्म पुर्याउने, संगठनमा नयाँ पुस्ताको अर्थपूर्ण सहभागिता बढाउने र तल्लो तहका कार्यकर्ताको आवाज नेतृत्वसम्म जोड्ने विषय आफ्नो प्राथमिकतामा रहने बताएका छन्।
नेपाली कांग्रेसले १५औँ केन्द्रीय महाधिवेशन आगामी २०८३ असोज १६, १७, १८ र १९ गते काठमाडौंमा गर्ने कार्यतालिका सार्वजनिक गरेको छ। पार्टीको केन्द्रीय निर्वाचन समितिका अनुसार विभिन्न तहको अधिवेशन प्रक्रिया पनि अघि बढिरहेको छ।
यसैक्रममा युवा खुलातर्फ भण्डारीको उम्मेदवारीले कांग्रेसभित्र नयाँ पुस्ताको प्रतिनिधित्व र नेतृत्वमा युवाको भूमिकासम्बन्धी बहसलाई थप अघि ल्याएको छ। अन्तिम प्रतिस्पर्धाको स्वरूप भने उम्मेदवारहरूको अन्तिम सूची र निर्वाचन प्रक्रिया पूरा भएपछि स्पष्ट हुनेछ।
