बुटवल :- लियो क्लब अफ बुटवल गोल्डेन जुबिलीका संस्थापक अध्यक्ष भेषराज पोखरेलका पिता स्वर्गीय नुमराज पोखरेलको स्मृतिमा बुटवल–१३, बदेलपोखरीस्थित जितेश्वरी माध्यमिक विद्यालयमा खानेपानी धारा निर्माण गरिएको छ।
असार ५ गते आयोजित विशेष समारोहबीच धाराको औपचारिक उद्घाटन तथा विद्यालयलाई हस्तान्तरण गरिएको हो। संस्थापक अध्यक्ष पोखरेलका सुपुत्र सम्राट पोखरेलको जन्मदिनको अवसर पारेर विद्यालय तथा स्थानीय समुदायको हितका लागि उक्त धारा निर्माण गरिएको बताइएको छ।
कार्यक्रमका प्रमुख अतिथि लियो जिल्ला परिषद् ३२५ पी नेपालका जिल्ला अध्यक्ष श्रीधर बस्याल रहेका थिए। कार्यक्रममा धारा निर्माण समितिका संयोजक आत्माराम भण्डारी, सह–संयोजक लक्ष्मण खनाल, विशाल खनाल तथा एरिया चिफ जीवन थापा क्षेत्रीले विद्यालयमा शुद्ध खानेपानीको पहुँच विस्तार गर्ने उद्देश्यले यो कार्य गरिएको बताएका थिए।
विद्यालयका प्राचार्य उपेन्द्र ज्ञवालीले क्लबको सामाजिक उत्तरदायित्वप्रतिको प्रतिबद्धताको प्रशंसा गर्दै यस कार्यबाट विद्यार्थी तथा विद्यालय परिवार प्रत्यक्ष रूपमा लाभान्वित हुने विश्वास व्यक्त गरे।
क्लबका अध्यक्ष लियो अशोक कुमार श्रेष्ठले आगामी दिनमा पनि यस्ता सामाजिक तथा सेवामूलक कार्यक्रमलाई निरन्तरता दिइने प्रतिबद्धता व्यक्त गरे।
कार्यक्रममा समाजसेवी कमल सापकोटा र सरु थापाले परोपकारी कार्यको प्रशंसा गरेका थिए। कार्यक्रमको सञ्चालन क्लबका मेम्बरसिप चेयरपर्सन लियो कविराज भुसालले गरेका थिए।
