गुल्मी :- नेपाली कांग्रेसबाट निर्वाचित दुई वडा अध्यक्ष दल परिवर्तनपछि पदमुक्त भएका छन् । स्थानीय तह निर्वाचनमार्फत कांग्रेसको तर्फबाट निर्वाचित भएका ती जनप्रतिनिधि पछिल्लो समय राष्ट्रिय स्वतन्त्र पार्टी (रास्वपा) मा प्रवेश गरेपछि उनीहरूको पद स्वतः रिक्त भएको निर्वाचन आयोगले जनाएको छ ।
निर्वाचन आयोगका अनुसार राजनीतिक दल सम्बन्धी नियमावली, २०७४ को नियम २२ को उपनियम (२) बमोजिम आफू निर्वाचित भएको दल परित्याग गरी अर्को दलमा आबद्ध हुने जनप्रतिनिधिको पद स्वतः रिक्त हुने व्यवस्था छ । सोही कानुनी प्रावधानअनुसार गुल्मीका दुवै वडा अध्यक्ष पदमुक्त भएको आयोगले स्पष्ट पारेको हो ।
पछिल्लो समय उनीहरूको दल परिवर्तनपछि पद कायम रहने वा नरहने विषयमा जिल्लाभर चासो बढिरहेको थियो । आयोगको निर्णयसँगै उक्त विषय कानुनी रूपमा टुंगिएको छ ।
नेपालको संविधान तथा राजनीतिक दलसम्बन्धी कानुनले दल परिवर्तनलाई नियन्त्रण गर्न स्पष्ट व्यवस्था गरेको छ । जनताले कुनै दलको विचार, घोषणापत्र र चुनाव चिह्नका आधारमा प्रतिनिधि चयन गर्ने भएकाले निर्वाचित भएपछि दल परिवर्तन गर्नु जनमतविपरीत हुने तर्कसहित यस्तो व्यवस्था गरिएको हो ।
गुल्मीको राजनीतिक वृत्तमा यस घटनाले नयाँ बहससमेत सिर्जना गरेको छ । एकातिर पुराना दलप्रति असन्तुष्टि बढ्दै जाँदा नयाँ राजनीतिक शक्तितर्फ आकर्षण बढेको चर्चा भइरहेको छ भने अर्कोतर्फ निर्वाचित जनप्रतिनिधिले दल परिवर्तन गर्दा जनताप्रति नैतिक जिम्मेवारी बहन गर्नुपर्ने बहस पनि उठ्न थालेको छ ।
रास्वपामा प्रवेश गरेका ती जनप्रतिनिधिले नयाँ राजनीतिक यात्रालाई निरन्तरता दिने बताएका भए पनि कानुनी व्यवस्थाका कारण वडा अध्यक्ष पद भने गुमाउनुपरेको हो । अब सम्बन्धित वडामा रिक्त पद पूर्तिका लागि आवश्यक प्रक्रिया अगाडि बढ्ने अपेक्षा गरिएको छ ।
