बुटवल :- बुटवलमा दर्ता नभएका ई–रिक्सा सञ्चालन रोक्न माग गर्दै वैधानिक रूपमा दर्ता भएका चालकहरूले आन्दोलन सुरु गरेका छन्। आफ्नो पेशा र आम्दानीमा असर परेको भन्दै उनीहरू उपमहानगरपालिकामा दबाब दिन पुगेका हुन्।
आन्दोलनरत चालकहरूको भनाइमा दर्ता बिना सञ्चालनमा रहेका ई–रिक्साले अनावश्यक प्रतिस्पर्धा बढाएको छ। हरियाली यातायातका अध्यक्ष तथा ई–रिक्सा चालक कृष्णप्रसाद तिवारी ले दर्ता नभएका सवारीलाई रोक नलगाएसम्म आन्दोलन जारी रहने बताए।
हाल बुटवलमा करिब १५४० ई–रिक्सा दर्ता भएका छन्। तर, दर्ता नभएका ई–रिक्साको संख्या अझ धेरै रहेको चालकहरूको गुनासो छ। उनीहरूका अनुसार यसअघि दर्ता भएका सवारी मात्रै सञ्चालन गर्न दिने सहमति भए पनि त्यसको प्रभावकारी कार्यान्वयन हुन सकेको छैन।
चालकहरूले सो सहमति तुरुन्त लागू गर्न, दर्ता प्रक्रिया कडाइका साथ कार्यान्वयन गर्न तथा अवैध रूपमा सञ्चालनमा रहेका ई–रिक्सामाथि कारबाही गर्न माग गरेका छन्।
दर्ता नभएका सवारी सञ्चालन हुँदा नगरपालिकाको राजस्वमा समेत असर परेको उनीहरूको दाबी छ।यसै क्रममा चालकहरूले दिनभर बुटवल बजारका विभिन्न क्षेत्रमा ठूलो संख्यामा ई–रिक्सा प्रदर्शन गर्दै आफ्नो आवाज उठाएका थिए।
