काठमाडौँ :- फागुन २१ गते हुने आमनिर्वाचनलाई लक्षित गर्दै गए राति १२ बजेदेखि मौन अवधि सुरु भएको छ। निर्वाचन आयोग ले मौन अवधिमा पालना गर्नुपर्ने नियमबारे जानकारी दिँदै देशभर आचारसंहिता अनुगमन अधिकृतमार्फत कडा निगरानी गरिने जनाएको छ।
आयोगका अनुसार मौन अवधिमा निर्वाचन प्रचारप्रसार पूर्ण रूपमा निषेध गरिएको छ। यस अवधिमा सभा, सम्मेलन, अन्तरक्रिया, गोष्ठी, जुलुस, प्रदर्शन, नाचगान, बाजागाजा, सार्वजनिक भोजभतेरलगायतका गतिविधि गर्न पाइँदैन।
त्यसैगरी सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा सन्देश, प्रचार सामग्री पोस्ट वा सेयर गर्न नपाइने आयोगले स्पष्ट पारेको छ। एसएमएस, साउण्ड सिस्टम वा अन्य कुनै माध्यमबाट मत माग्नसमेत रोक लगाइएको छ।
मतदान कार्य प्रारम्भ हुनुभन्दा तीन घण्टा अघिदेखि मतदान समाप्त नभएसम्म मतदाता वा मतदान केन्द्रमा खटिएका कर्मचारीलाई अवरोध गर्ने कुनै पनि गतिविधि गर्न नपाइने आयोगको चेतावनी छ।
आयोगले राजनीतिक दल तथा उम्मेदवारलाई सामाजिक सञ्जालमा राखिएका विज्ञापन तथा प्रचार सामग्री हटाउन निर्देशन दिएको छ। साथै, मतदान स्थलको ३०० मिटर वरिपरि राखिएका प्रचार सामग्री मतदान हुनुभन्दा ४८ घण्टा अगावै हटाउनुपर्ने व्यवस्था रहेको छ।
मतदान केन्द्र वरपर शान्ति भंग गर्ने, भय–त्रास सिर्जना गर्ने वा निर्वाचन वातावरण बिथोल्ने गतिविधि गरे कानुनी कारबाही हुने आयोगले जनाएको छ।
