बुटवल :- स्कलर्स होम सेकेण्डरी स्कुलले आफ्नो ३४औँ स्थापना दिवसको अवसरमा विविध शैक्षिक तथा रचनात्मक कार्यक्रम आयोजना गर्ने भएको छ। विद्यालयले पुस १० र ११ गते जिल्लास्तरीय अन्तरविद्यालय रनिङ शिल्ड हाजिरीजवाफ (क्विज) प्रतियोगितासहित पुरस्कार वितरण तथा अन्य कार्यक्रम गर्ने जनाएको हो।
मंगलबार विद्यालयको सी ब्लकमा आयोजित पत्रकार सम्मेलनमा जानकारी दिँदै प्राचार्य बाबुराम बन्जाडेले विगत १३ वर्षदेखि निरन्तर सञ्चालन हुँदै आएको हाजिरीजवाफ प्रतियोगिताको यो १२औँ संस्करण रहेको बताए। उनका अनुसार पुस १० गते हाजिरीजवाफ प्रतियोगिता र पुस ११ गते स्थापना दिवस समारोह तथा पुरस्कार वितरण कार्यक्रम हुनेछ।
हाजिरीजवाफ प्रतियोगितामा प्रथम हुने विद्यालयलाई नगद १० हजार रुपैयाँसहित शिल्ड, मेडल र प्रमाणपत्र प्रदान गरिनेछ। दोस्रो हुनेले ७ हजार ५ सय र तेस्रो हुनेले ४ हजार ५ सय रुपैयाँ नगद पुरस्कार प्राप्त गर्नेछन्। हालसम्म ४० वटा विद्यालय प्रतियोगितामा दर्ता भइसकेको विद्यालयले जनाएको छ। प्रतियोगितामा कक्षा १० सम्मका विद्यार्थी सहभागी हुन पाउने र कम्तीमा एक जना छात्रा अनिवार्य सहभागी हुनुपर्ने व्यवस्था गरिएको छ।
गत वर्षको प्रतियोगितामा एभरेष्ट इङ्लिस बोर्डिङ स्कुल विजेता बनेको थियो भने न्यु होराइजनले यसअघि दुई पटक लगातार तीन–तीन वर्ष रनिङ शिल्ड जितेको थियो।
कार्यक्रममा विद्यालय व्यवस्थापन समितिका अध्यक्ष मनहरि बश्यालले सामाजिक सेवाको उद्देश्यसहित विद्यालय स्थापना गरिएको बताउँदै स्कलर्स होमले आईएसओ मान्यता प्राप्त गरिसकेको जानकारी दिए।
विद्यालयका संस्थापक शिव गुरुङले भारतमा अध्ययन गरेको अनुभवलाई आधार बनाएर गुणस्तरीय शिक्षा प्रदान गर्ने लक्ष्यसहित स्कलर्स होम स्थापना गरिएको बताए। उनले परीक्षाको प्रश्नपत्र अभिभावकलाई देखाउने अभ्यास, विद्यार्थीलाई मार्शल आर्ट सिकाउने र औपचारिक कार्यक्रम विद्यार्थीलाई नै जिम्मा दिने अभ्यास विद्यालयका विशेष पहिचान भएको उल्लेख गरे।
कार्यक्रममा संस्थापिका लक्ष्मी गुरुङ र भ्वाइस प्रेसिडेन्ट टिकाराम गौतमले वडा नम्बर ९ मा स्कलर्स होम एकमात्र विद्यालय रहेको बताए।
हाल विद्यालयमा नर्सरीदेखि कक्षा १२ सम्म करिब १ हजार ५ सय विद्यार्थी अध्ययनरत छन् भने बीबीएस तहमा करिब १५० विद्यार्थी अध्ययनरत छन्। विद्यालयमा १२० जना शिक्षक तथा कर्मचारी कार्यरत रहेका छन्।
