बुटवल :- रुपन्देही उद्योग संघको आयोजनामा ‘समृद्ध नेपाल निर्माणको आधार, स्वदेशी उद्यमशीलताको विस्तार’ भन्ने मूल नारासहित बुटवलमा सुरु भएको १६औँ राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव–२०८२ मा चिसो मौसमका बाबजुद अवलोकनकर्ताको भीड बढ्दै गएको छ।
बिहीबारदेखि सुरु भएको प्रदर्शनीको दोस्रो दिन शुक्रबार अवलोकनकर्ताको उल्लेख्य उपस्थिति देखिएको गेट टिकट उपसमितिका संयोजक राजु घिमिरेले जानकारी दिनुभयो। बुटवल मण्डपमा निर्माणाधीन अन्तरराष्ट्रिय प्रदर्शनी केन्द्रमा सञ्चालन भइरहेको प्रदर्शनीमा स्वदेशी उत्पादनका करिब ५ सय वटा स्टल राखिएका छन्। स्टलहरूलाई विभिन्न विधाअनुसार १० वटा पेभिलियनमा विभाजन गरिएको छ।
प्रदर्शनीमा देशका ३९ जिल्लाबाट सहभागिता रहेको छ। शनिबार पहिलो साप्ताहिक बिदा परेकाले अवलोकनकर्ताको संख्या अझै बढ्ने अनुमान गर्दै आयोजकले सोही अनुसारको तयारी गरेको जनाएको छ। सहभागी अवलोकनकर्ताहरूले स्वदेशी उत्पादनमा विशेष चासो देखाउँदै उद्योगहरूको अध्ययन गरिरहेको सदस्य सचिव सुमन बस्यालले जानकारी दिनुभयो।
स्वदेशी उत्पादनको प्रदर्शन र बजारीकरण मुख्य उद्देश्य राखिएको प्रदर्शनीमा करिब ८ लाख दर्शकले अवलोकन गर्ने र ३० करोड रुपैयाँ बराबरको आर्थिक कारोबार हुने लक्ष्य राखिएको प्रदर्शनी प्रबन्धक यादव भण्डारीले जानकारी दिनुभयो।
प्रदर्शनीलाई थप आकर्षक र मनोरञ्जनात्मक बनाउन लोकदोहोरी प्रतियोगिता, ख्यातिप्राप्त आधुनिक गायक–गायिकाका प्रस्तुति, हास्य कलाकार, ब्याण्डहरूको सांगीतिक कार्यक्रम, विद्यालयस्तरीय लोकनृत्य तथा वक्तृत्वकला प्रतियोगिता, प्रदर्शनी आइडल, भजन प्रतियोगितालगायतका कार्यक्रम समावेश गरिएको सांस्कृतिक उपसमिति संयोजक लालप्रसाद बस्यालले जानकारी दिनुभयो।
प्रदर्शनीमार्फत प्रविधिबारे जानकारी दिने, उद्योगी र उपभोक्ताबीच प्रत्यक्ष सम्पर्क स्थापित गर्ने, उत्पादित वस्तुहरूको बजार प्रवर्द्धन तथा गुणस्तरीय प्रतिस्पर्धा विकास गर्ने उद्देश्य राखिएको सचिव तथा परिचयपत्र उपसमिति संयोजक अशोक कुँवरले बताउनुभयो। साथै उद्योगीहरूबीच समस्या, अवसर र चुनौतीबारे अन्तरक्रिया, सूचना तथा प्रविधिको आदानप्रदान, पर्यटन प्रवर्द्धन, गोष्ठी, अन्तरक्रिया तथा कार्यशालाको आयोजना गरिनेछ।
प्रचारप्रसार संयोजक किरण खरेलका अनुसार प्रदर्शनीमा औद्योगिक प्रविधि, रेष्टुरेन्ट, कृषि, हस्तकला, फ्लोरिकल्चर, गार्मेन्ट, बेकरी तथा कन्फेक्सनरी, छालाजुत्ता, खाद्यान्न, आइटीलगायतका क्षेत्रका गरी करिब ५ सय स्टल समावेश छन्।
