काठमाडौं :- नेपाल मेडिकल काउन्सिल ले एकैपटक १७ जना चिकित्सकको दर्ता प्रमाणपत्र (लाइसेन्स) खारेज गरेको छ।
काउन्सिलका रजिष्ट्रार डा सतिशकुमार देव का अनुसार नेपाली नागरिकता परित्याग गरी विदेशी राहदानी लिएका चिकित्सकहरूको नाम दर्ता किताबबाट हटाउने निर्णय गरिएको हो।
उनले नेपाल मेडिकल काउन्सिल ऐन २०२०, नियमावली २०२४ तथा नेपाल नागरिकता ऐन २०६३ अनुसार यस्तो निर्णय गरिएको स्पष्ट पारे।
लाइसेन्स खारेज गरिएका चिकित्सकहरूमा डा शर्मिला गुरुङ, डा रोशन भुसाल, डा मोती गुरुङ, डा देवराज रेग्मी, डा मेरिना गुरुङ, डा नीरञ्जनदेव पाण्डे, डा रोजन केसी, डा ममता गुरुङ, डा राजीव हमाल, डा सलुजा सिंह थारु लगायत रहेका छन्। यस्तै डा सुजना केसी, डा जोस्ना शाही, डा मनिषा हमाल, डा सुप्रिया शाक्य, डा इच्छा न्यौपाने, डा दीपेन ढकाल र डा तुसार सरवजना पनि समावेश छन्।
काउन्सिलका अनुसार ती चिकित्सकहरूले ब्रिटेन, अमेरिका, पोर्चुगल, क्यानडा, भारत, अष्ट्रेलिया र हङकङ लगायत देशको नागरिकता लिएका छन्।यस निर्णयसँगै विदेशी नागरिकता लिएका चिकित्सकहरूले नेपालमा चिकित्सकीय अभ्यास गर्न पाउने व्यवस्था स्वतः निष्क्रिय भएको छ।
