काठमाडौं :- प्रतिनिधिसभा सदस्यको प्रत्यक्षतर्फ उम्मेदवारी दर्ता गर्दा उम्मेदवारले १० हजार रुपैयाँ धरौटी रकम राख्नुपर्ने भएको छ। तर महिला, दलित, अल्पसंख्यक तथा आर्थिक रूपमा विपन्न उम्मेदवारले धरौटी रकममा ५० प्रतिशत छुट पाउने निर्वाचन आयोगले जनाएको छ।
निर्वाचन आयोगका सहसचिव तथा प्रवक्ता नारायणप्रसाद भट्टराईले जारी गरेको विज्ञप्तिअनुसार उम्मेदवारी दर्ताका क्रममा आवश्यक कागजात तथा प्रक्रिया सार्वजनिक गरिएको हो। विज्ञप्तिमा प्रतिनिधिसभा सदस्य निर्वाचनका उम्मेदवारले सम्बन्धित निर्वाचन अधिकृतको कार्यालयमा धरौटी रकम जम्मा गरी त्यसको रसिद वा भौचर मनोनयन पत्रसँगै पेस गर्नुपर्ने उल्लेख गरिएको छ।
आयोगका अनुसार २ माघदेखि देशभरका सबै निर्वाचन क्षेत्रमा मुख्य निर्वाचन अधिकृत तथा निर्वाचन अधिकृतका कार्यालय स्थापना भइसकेका छन्। उम्मेदवारले ती कार्यालयमा उपस्थित भई मनोनयन पत्र दर्ता गर्न सक्नेछन्।
महिला, दलित, अल्पसंख्यक समुदाय तथा आर्थिक रूपमा विपन्न उम्मेदवारको हकमा धरौटी रकम ५० प्रतिशत मात्र बुझाए पुग्ने व्यवस्था गरिएको छ। आर्थिक रूपमा विपन्न उम्मेदवारले भने सम्बन्धित स्थानीय तहबाट ‘आर्थिक रूपमा विपन्न’ भएको सिफारिस पत्र अनिवार्य रूपमा पेस गर्नुपर्नेछ।
आगामी फागुन २१ गते हुने प्रतिनिधिसभा निर्वाचनका लागि प्रत्यक्षतर्फको उम्मेदवारी दर्ता पर्सिदेखि सुरु हुने आयोगले जनाएको छ। उम्मेदवारी दर्ता प्रक्रिया सहज बनाउन आयोगले दुई दिनअघि नै सूचना प्रकाशित गरी आवश्यक विवरण सार्वजनिक गरेको हो।निर्वाचन नजिकिँदै जाँदा उम्मेदवारी दर्तासम्बन्धी तयारी र राजनीतिक गतिविधि देशभर तीव्र बन्दै गएको छ।
